Qazaqstandyq ǵalym Reseı SІM marapatyna ıe boldy
ASTANA. QazAqparat - Belgili qazaqstandyq fılolog, professor Nursulý Shaımerdenova Reseı Federatsııasy Syrtqy ister mınıstrliginiń «Yqpaldastyǵy úshin» medalimen marapattaldy, dep habarlaıdy QazAqparat.
Bul týraly Qazaqstandyq Reseı (keńes) joǵary oqý oryndary túlekteri qaýymdastyǵynyń prezıdenti Aıbol Arǵynǵazınov Facebook áleýmettik jelisindegi paraqshasynda jazdy.
Atalǵan marapat qazaqstandyq ǵalymǵa álemdik slavıstıka ǵylymyna, tilaralyq baılanystar, tilder men mádenıetterdiń ózara únqatysýyna qosqan úlesi úshin berilip otyr.
Fılologııa ǵylymdarynyń doktory, professor Nursulý Shaımerdenova - Qazaqstan Respýblıkasy Bilim berý salasynyń qurmetti qyzmetkeri, Mádenıet salasynyń úzdigi, Qazaqstan halqy Assambleıasy Ǵylymı-saraptamalyq keńesiniń múshesi, Qazaqstandyq Reseı (keńes) joǵary oqý oryndary túlekteri qaýymdastyǵynyń qurmetti prezıdenti.
Professor N. Shaımerdenova - 250-den astam ǵylymı eńbektiń, qazaq, orys, uıǵyr mektepterine arnalǵan orys tili oqýlyǵynyń, 10-nan asa monografııanyń, oqý quraldarynyń avtory. Ǵalymnyń jetekshiligimen 9 ǵylym doktory, 27 ǵylym kandıdaty ázirlengen.
Otandyq ǵalymnyń eńbegi Reseı Federatsııasynyń memlekettik nagradasy - Pýshkın medalimen, QR Ulttyq akademııalyq kitaphanasynyń G.H.Andersen atyndaǵy syılyǵymen atap ótilgen.
