Qazaqstandyq ǵalym qylmystyq saıasatty izgilendirýdiń jańa modelin usyndy
ASTANA. 9 shilde. QazAqparat /Jasulan Amanbaıuly/ - Búgin Astanada zań ǵylymdarynyń kandıdaty Qýat Rahymberdınniń «Qazaqstandaǵy azamattyq qoǵam men onyń qylmystyq saıasatty izgilendirýdegi róli» atty monografııasynyń tanystyrylymy boldy.
Zertteýde azamattyq qoǵamnyń qylmystyq saıasatty izgilendirý sýbektisi retinde qarastyrylady. Sonymen qatar onyń ınnovatsııalyq modeliniń qurylý, qalyptasý jáne damý kezeńderindegi keshendi problemalary qamtylǵan. Q. Rahymberdınniń osy saladaǵy taqyryby Qazaqstanda tuńǵysh ret zerttelip otyr. Sonymen qatar avtor atalǵan eńbekte úkimettik emes uıymdardyń kásibı róli týraly, sonyń ishinde dinı birlestikterge jáne olardyń qoǵamdaǵy orny týraly jeke toqtalady.
«Men atalmysh monografııa arqyly qylmystyq saıasatty izgilendirý úderisine azamattyq qoǵamnyń qatysý modelin jasaqtaýdy maqsat ettim», - deıdi avtor.
«Qazaqstannyń qylmystyq saıasaty áli de bolsa Keńes dáýirinen kele jatqan keıbir túıtkilderden arylǵan joq. Ony 20 jyl ishinde joıý múmkin de emes. Sondyqtan atalǵan ózekti máselelerdi sheshýde eldegi barlyq azamattyq sýbektilerdiń qatysýy asa qajet», - dep esepteıdi ol.
Avtordyń pikirinshe, bul iske táýelsiz BAQ belsendi aralasýy tıis. Olar ótkir máselelerdi qanshalyqty ashyq ári jarııa etetin bolsa, qoǵam sonshalyqty saýyǵa túspek, qylmystyq saıasat soǵurlym júıelene bermek.
