Qazaqstandyq ǵalym kúrdeli synyqtardy emdeıtin gıdrogel oılap tapty
Ol synyqtar men zaqymdalǵan tize býyndaryn emdeýdi jedeldetetin gıdrogel oılap tapty, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.
Arnaıy tehnologııanyń arqasynda operatsııadan keıin 3-6 aı ishinde súıek jáne shemirshek tinderi qalpyna keledi. Klınıkaǵa deıingi synaqtardyń nátıjeleri preparattyń tıimdiligi joǵary ekenin rastady.
«Súıek aqaýlaryn tolyqtaı qalpyna keltirý travmatologııa men ortopedııadaǵy kúrdeli jáne sheshilmegen máselelerdiń biri bolyp qala beredi. Emdeý úshin súıek almastyrǵyshtaryn qoldana otyryp, osteoplastıkanyń ártúrli ádisteri jıi qoldanylady. Biraq bul operatsııanyń nátıjesinde súıek árdaıym tolyq qalpyna kelmeıdi. Biz súıek aqaýlarynyń tolyq qalpyna kelýine yqpal etetin tehnologııany jasadyq. Baǵanaly jasýshalar men tabıǵı bıopolımerler zaqymdalǵan súıek nemese shemirshek tinderin qalpyna keltirý protsesin jedeldetedi», — dedi ázirleme avtory, Ulttyq bıotehnologııa ortalyǵynyń baǵanaly jasýshalar zerthanasynyń meńgerýshisi, professor Vıacheslav Ogaı.
Ǵalymnyń aıtýynsha, gıdrogelder súıek tinin jasaýda qańqa retinde qoldanylady. Qurylymynda olar dáneker tininiń negizine uqsas, sondyqtan barlyq bıomaterıaldar arasynda jasýsha transplantatsııasy úshin eń qolaıly.
Qazir alǵashqy operatsııalardy baǵanaly jasýshalar negizinde gıdrogel arqyly júrgizý josparlanyp jatyr. Kúrdeli synyqtar men zaqymdalǵan býyndardy qalpyna keltirýdiń biregeı tehnologııasy travmatologııa men ortopedııada kórsetiletin medıtsınalyq qyzmetterdiń deńgeıin aıtarlyqtaı arttyrady dep kútilýde. Preparat mamandandyrylǵan aýrýhanalar men ǵylymı medıtsınalyq ortalyqtarda qoldanylady.
