Qazaqstandyq ǵalym ISESCO syılyǵynyń laýreaty atandy
Ál-Farabı atyndaǵy QazUÝ rektory Ǵalym Mutanov ǵylym men tehnologııa salasyndaǵy ıslamdyq ISESCO syılyǵynyń ıegeri atandy.
Islam uıymynyń bilim, ǵylym men mádenıet salasyndaǵy (ISESCO) syılyǵy uıymǵa múshe memleketterdiń ǵalymdaryna eki jylda bir ret bıologııa, hımııa, geologııa, matematıka, fızıka jáne ǵylymı tehnologııalar salasyndaǵy erekshe ǵylymı-ınnovatsııalyq úlesi úshin beriledi. Syılyq quramyna arnaıy sertıfıkat pen altyn medal jáne aqshalaı syılyq kiredi.
«Bıylǵy jyly bul syılyqqa matematıkalyq modeldeý men tehnıkalyq jáne áleýmettik-ekonomıkalyq júıelerdi basqarý salasy boıynsha qosqan erekshe úlesi úshin qazaqstandyq ǵalym, ál-Farabı atyndaǵy QazUÝ rektory Ǵalym Mutanov laıyqty dep tabyldy. Bul syılyqqa ıe bolý - Mutanovtyń ǵylymı qyzmetiniń joǵary, halyqaralyq deńgeıde ekendigin kórsetedi»,-delingen joǵary oqý orny taratqan habarlamada.
ISESCO syılyǵy 1979 jyly «Islam konferentsııasy» uıym tarapynan uıymdastyrylǵan bekitilgen. Uıymnyń qyzmeti ıslam elderinde ǵylym men bilimdi jáne mádenıetti damytýǵa baǵyttalǵan.
