Qazaqstandyq fýtbolshylarǵa bir jylda 104 mln eýro jalaqy tólendi

Eýropa fýtbolynyń segizinshi salystyrmaly esep-qısabynda kóptegen derekter bar.

Qyzyqty derekter

ÝEFA 2015 jylǵy qarjylyq eseptemesinde sońǵy 20 jylda fýtbol klýbtarynyń tabysy ósip kele jatqandyǵyn aıryqsha atap ótken. Búginde Eýropa klýbtarynyń jalpy paıdasy shamamen 17 mıllıard eýro eken.

Eýropa fýtbolynda buryn-sońdy bolmaǵan ınvestıtsııa deńgeıi de baıqalatyn kórinedi. Mysaly, 2014-2017 jyldary 58 jańa stadıon paıdalanýǵa berilgen. Al buǵan deıingi tórt jyldyqta (2010-2013 jj) 23 stadıon salynǵan eken.

Jalpy, búgingi tańdaǵy ekonomıkalyq daǵdarys kezinde Eýropa fýtbolynyń paıda kórip, tabys tabýyna «qarjy feır-pleıi» kóp áser etken kórinedi. Máselen, sońǵy eki jyldy operatsııalyq jıyntyq paıda 1,5 mıllıard eýroǵa deıin ósken. Al «qarjy feır-pleıi» engizilgenge deıingi eki jylda shyǵyn somasy 700 mılıon eýroǵa jetken.

Jalpy, ÝEFA-nyń 130 bettik qarjylyq esep-qısabynda kóptegen qyzyqty derekter bar. Endi solardyń birnesheýine toqtalyp óteıik:

-       2015/2016 jyldar maýsymynda Eýropa chempıonattarynyń oıyndaryn 170 mıllıon kórermen stadıonnan tamashalaǵan. Munyń 55 mıllıony - Anglııa jáne Germanııa chempıonattarynyń kórermenderi.

-       Dál qazir Eýropanyń top-lıgalaryndaǵy 44 komandanyń qojaıyny - sheteldikter (18 memleketten).

-       Legıonerleri eń kóp chempıonat - Anglııa premer-lıgasy (shamamen 70 paıyzy sheteldik fýtbolshylar).

-       28 memlekette komandadaǵy fýtbolshylar sanyna, al 15 lıgada oıynshylardy jalǵa berýge shekteý qoıylǵan.

-       Eýropadaǵy eń úzdik 15 klýb demeýshilik kelisimder men jarnamadan 1,51 mıllıard paıda kórgen (148 %). Al ÝEFA quramyndaǵy elderdiń eń joǵarǵy dıvızıondarynda oınaıtyn qalǵan 700 klýbtyń (shamamen, dóńgeletip alynǵan) mundaı tabystary 453 mıllıon eýro «ǵana» (17 %).

Jalaqyny kóp tóleımiz...

ÝEFA qarjylyq eseptemesinde ár eldiń joǵary tobyndaǵy klýbtardyń 2015/2016 jyldar maýsymynda fýtbolshylaryna qansha jalaqy tólegendigi de eseptelip shyǵarylǵan.

Bul rette, Qazaqstan premer-lıgasynda fýtbolshylarǵa 104 mıllıon eýro jalaqy tólengen. Sonda orta eseppen árbir klýbymyz 8,7 mıllıon eýrony jalaqy tóleýge jumsaıdy. Bul kórsetkish jaǵynan biz Eýropada 13-orynda ekenbiz.

Kósh basynda - Anglııa premer-lıgasy (2,69 mıllıard eýro). Jalpy, bizdiń aldymyzdaǵy elder - Germanııa, Italııa, Ispanııa, Frantsııa, Reseı, Túrkııa, Nıderlandy, Shveıtsarııa, Belgııa, Potýgalııa, Avstrııa.

Desek te, Qazaqstan premer-lıgasynyń klýbtary jalaqyǵa kóp qarjy jumsaıdy eken. Mysaly, bizdiń klýbtarymyz jalpy kiristeriniń 78%-yn fýtbolshylarynyń jalaqysyna tóleıdi. Bul turǵyda, tek Túrkııa ǵana bizden asyp túsken. Túrik aǵaıyndarymyz jalpy kiristeriniń 80%-yn jalaqy tóleýge jumsapty. Al Aǵylshyn premer-lıgasy - 61%, Býndeslıga - 52%, A serııasy - 69%, La-lıga - 60%.

Derekkóz: Astana fýtbol federatsııasy