Qazaqstandyq fýtbolshylar Álem chempıonatynyń jartylaı fınalyna deıin jetti
ASTANA. QazAqparat - Qazaqstandyq fýtbolshylar FIF7 (7H7 formatyndaǵy fýtbol) Álem chempıonatynyń jartylaı fınalyna kirip, Brazılııadan oısyraı utyldy, dep habarlaıdy «SPORTINFORM» SAA.
Brazılııanyń Kýrıtıb qalasynda Qazaqstan quramasynyń qatysýymen áýesqoılar arasynda erekshe Álem chempıonaty ótip jatyr. Komandalar 7H7 formatynda parkettiń ústine tóselgen jasandy gazonda oınap jatyr. Fýtboldyń bul túri bizdiń elde asa tanymal emes. Soǵan qaramastan, almatylyq SKA bazasynda jasaqtalǵan komanda álemdik birinshilikke attandy.
Qazaqstan quramasynyń quramy: Denıs Krıger (qaqpashy), Danııar Sopıev, Bektas Izızov, Erkin Nurjanov, Nursultan Nurjigit, Qaırat Kúlbarakov (oınaıtyn jattyqtyrýshy), Ashat Esimbaev, Elshat Tóken jáne Jasyn Qaıypbaev.
Bizdiń komanda Argentına, Meksıka jáne Kolýmbııa ókilderimen bir topqa tústi. Perý komandasy da kelýi tıis edi, biraq olar qatysýdan bas tartty. Sondaı-aq, chempıonat týrnıri bastalardyń aldynda Kolýmbııadaǵy bir top oıynshylardyń elden kete almaıtyny belgili bolyp, olar da kele almaǵan. Soǵan qaramastan, úsh komanda ózara oınady. Qazaqstan Argentınany basyp ozyp (6:5), topta ekinshi orynǵa ıe boldy jáne meksıkalyqtarǵa «býllıt» boıynsha - matchtan keıingi penaltıde ese jiberdi.
Bizdiń komanda pleı-offke shyǵyp, Ýrýgvaı quramasyna tap boldy. Onda da jeńiske jetip (3:1), jartylaı fınalǵa joldama aldy. Biraq, onda qazaqstandyqtardy týrnırdiń basty favorıti - mýndıal ıesi Brazılııa kútip turdy.
Shırek fınalda brazılııalyqtar A tobyndaǵy tórtinshi komandamen oınaýǵa tıis edi. Biraq, Kolýmbııa kelmegendikten, jartylaı fınalǵa tikeleı shyqty. Qazaqstandyqtar tańerteń Ýrýgvaımen oınap jatqanda, Brazılııa komandasy demaldy. Osylaısha, kezdesý 10:2 esebimen aıaqtaldy.
«Brazılııaǵa tótep beretin kúshimiz qalmady. Olardyń komandasy óte myqty jáne olar týrnırdiń ıeleri. Al, biz birneshe saǵat buryn ǵana Ýrýgvaımen oınadyq. Sondyqtan, shart teń bolǵan joq. Soǵan qaramastan, biz osy týrnırde Qazaqstannyń namysyn laıyqty qorǵap, jartylaı fınalǵa shyqtyq. Mysaly, Reseı shırek fınaldan óte alǵan joq», - dep esepteıdi komanda oıynshysy Jasyn Qaıypbaev.
Endi, qazaqstandyqtar 3-oryn úshin taǵy da argentınalyqtarmen oınaıdy.
