Qazaqstandyq fýtbolshy Moldavııadaǵy klýbpen kelisimshart jasasty
QARAǴANDY. QazAqparat – Qazaqstan jasóspirimder quramasynyń shabýylshysy Danıl Ankýdınov moldavııalyq «Sherıf» fýtbol klýbymen kelisimshartqa qol qoıdy, dep habarlaıdy QazAqparat tilshisi.
18 jastaǵy Danıl Ankýdınov Qaraǵandy týmasy. Fýtboldy týǵan qalasynda oınaı bastady. Sodan keıin Ispanııaǵa shaqyrtý alyp, «Marset» pen «Kasablanka» klýbtarynda oınady. Sońǵy jarty jylda «Rodına» FK (Máskeý) ekinshi komandasy úshin oınady.
Fýtbolshy moldavııalyq «Sherıf» FK-na irikteýden ótip, qarsylastarynyń qaqpasyna eki ret soqqy berdi.
«Men kelisimshartqa qol qoıǵanyma óte qýanyshtymyn. Maǵan osy úlken otbasynyń múshesi bolýǵa ruqsat bergenderińiz úshin rahmet!»- dep jazdy Danıl Ankýdınov Instagram-paraqshasynda.
«Sherıf» FK 2021 jylǵy álemniń úzdik klýbtarynyń reıtınginde «Inter» men «Barselonany» basyp ozdy. Jáne 28-shi orynda turdy.
Ótken jyldyń kúzinde ujym Chempıondar lıgasy týrnıriniń toptyq kezeńine qatysty. Klýb madrıdtik «Realdy» jeńdi. Nátıjesinde komanda topta 3-shi oryn alyp, Eýropa Lıgasyna kirdi.
