Qazaqstandyq fýtbolshy komandadaǵy áriptesine 4 000 lır qarjyny syıǵa tartty
ASTANA. QazAqparat - Túriktiń «Gıresýnspor» komandasyndaǵy qazaqstandyq fýtbolshy Anton Chıchýlın óziniń komandalas joldasy Aıaz Mehtıevke márttik jasady. Bul týraly Sport.kz habarlady.
Túrik klýbynan ketip bara jatqan Chıchýlın «Ordýspor» klýbyn jeńgeni úshin berilgen 4 000 lır mólsherindegi syıaqysynan bas tartty. Qazaqstandyq qorǵaýshy bul aqshany jas oıynshy, kóp ýaqyt boıy jaraqatynan emdelgen Aıaz Mehtıevke berýdi ótindi. Chıchýlınniń bul márttik sheshimine búkil komanda qoshemetpen qol soqty.
Bas jattyqtyrýshy Erkan Sozer Chıchýlın taǵy da óziniń márttigin kórsetti, dep málimdedi. «Bizdiń Chıchýlınnen aıyrylyp qalǵanymyz ókinishti. Bul minezi tamasha jáne naǵyz kásipqoı oıynshy», - dedi.
«Gıresýnsporda» jarty jyl bolǵan kezde Chıchýlın men Mehtıev dostasyp ketti, Anton túrik tilin bilmeıtin, al ázerbaıjan fýtbolshysy oǵan aýdarma jasaýǵa kómektesti.
