Qazaqstandyq fýtbolshy ataqty Ramospen birge úzdikter quramasyna endi
NUR-SULTAN.QazAqparat – Fýtboldan Qazaqstan quramasynyń qorǵaýshysy Temirlan Erlanov Ulttar Lıgasynyń úshinshi týrynyń úzdik quramyna endi, dep habarlaıdy QazAqparat tilshisi.
SofaScore analıtıkalyq portalynyń nusqasy boıynsha Temirlan Erlanov Qazaqstan-Albanııa matchynyń úzdik oıynshysy atanyp, 8.1 upaı jınady. Sol kezdesýde Erlanov ulttyq quramanyń qaqpasyn goldan aman saqtap qalǵan edi.
Temirlannan ózge bul tizimde álemge áıgili ıspandyq qorǵaýshy Serhıo Ramospen qatar tur. Sondaı-aq, quramda Martın Edegor, Erlıng Holland sııaqty ataqty fýtbolshylar bar.
«Biz bul oıynda qorǵanysqa asa mán berdik. Al qorǵaýshynyń qaqpashyǵa kómektesýi – zańdylyq. Sondyqtan qaqpany goldan aman saqtap qalǵanymdy erlik dep eseptemeımin. Qorǵaýshy retindegi mindetim edi. Menen basqa da áriptesterim janyn berip oınady. Olardyń árqaısysy da meniń ornymdy basa alady. Árıne, eńbegińdi baǵalap, úzdikter quramyna engizip jatsa, ishiń jylyp qalady», - dedi fýtbolshy agenttik tilshisine telefon arqyly.
Temirlan Erlanov Qazaqstan quramasy sapynda alǵash ret 2019 jyly 21 aqpanynda Moldova quramasyna qarsy alańǵa shyqty. Osy ýaqytqa deıin 8 matchqa alańǵa shyǵyp,1 gol soqqan. Qazir Temirlan Qostanaıdyń «Tobylynda» dop tebedi.
Sonymen Ulttar Lıgasynyń úshinshi týryndaǵy úzdik komanda mynadaı:
Kaıl Goldýın (Gıbraltar), Temirlan Erlanov (Qazaqstan), Serhıo Ramos (Ispanııa), Martın Edegor, Erlıng Hollan, Aleksandr Serlot, Bırger Melıng (barlyǵy – Norvegııa), Anastasıos Bakasetas (Gretsııa), Raýno Sappınen (Estonııa), Vensan Tıll (Lıýksembýrg), Odmar Fere (Farer araldary).
