Qazaqstandyq fýtbol klýbtardyń eýrokýbok oıyndary qaı telearnadan kórsetiledi
NUR-SULTAN. QazAqparat - Qazaqstandyq klýbtardyń qatysýymen ótetin UEFA Konferentsııa lıgasy oıyndarynyń qaı telearnadan kórsetetini belgili boldy, dep habarlaıdy QazAqparat tilshisi.
Atalǵan týrnırdegi barlyq oıyn 21 shildege belgilengen. Tikeleı kórsetilim Qazsport telearnasynan júrgiziledi.
Qazaqstandyq klýbtar arasynda alǵashqy bolyp saǵat 17:50-de Petropavldyń «Qyzyljary» elordada Horvatııanyń «Osıek» komandasyn qabyldaıdy.
Odan keıin 19:50-de Almatyda «Qaırat» Vengrııanyń «Kıshvarda» klýbymen jasyl alańǵa shyǵady.
Al 21:50-de qostanaılyq «Tobyldyń» Gıbraltarda ótetin jergilikti «Lınkolna Red Imps» klýbymen kezdesýi jankúıer nazaryna usynylady. Negizinde oıynnyń bastalýy 20:00-ge belgilengen.
Sondaı-aq, 00:50-de elordalyq «Astana» syrt alańda Polshanyń «Rakýv» komandasyna qarsy oınaıdy.
Eske salsaq, budan buryn qazaqstandyq klýbtardyń fýtboldan UEFA Konferentsııa lıgasy úshinshi irikteý satysyndaǵy yqtımal qarsylastary anyqtaldy.
