Qazaqstandyq flot Reseıdiń ishki sý joldary arqyly ashyq teńizge shyǵa alatyn boldy
ASTANA. QazAqparat - Qazaqstandyq flottyń Reseıdiń ishki sý joldary arqyly ashyq teńizderge shyǵýyna múmkindik jasalady. Bul týraly Indýstrııa jáne ınfraqurylymdyq damý mınıstri Jeńis Qasymbek Feısbýktegi paraqshasynda jazdy, dep habarlaıdy QazAqparat tilshisi.
«Úkimet basshylarynyń deńgeıinde ótken Eýrazııalyq ekonomıkalyq odaqtyń úkimetaralyq keńesiniń otyrysynda EAEO-nyń áriptes-mınıstrlerimen keme qatynasy týraly kelisimge qol jetkizdik. Bul qujattyń Qazaqstan úshin strategııalyq mańyzy zor. Kelisimmen ishki sý joldaryndaǵy kemelerdiń tranzıttik ótýi úshin ońaılatylǵan ruqsat berý rásimin engizý (ruqsat berý merzimi 10 kúndi quramaq, qazirgi ýaqytta 3 aıdan 6 aıǵa deıin), ekijaqty tasymaldaý kezindegi habarlandyrý tártibi, taraptarmen EAEO elderiniń kemelerine porttardyń qyzmetterine teń qol jetkizý sharttaryn berý, onyń ishinde porttyq alymdardy tólegen kezde kemelerdiń ekıpaj músheleriniń qujattaryn jáne teńizshilerdiń biliktilik qujattaryn ózara taný kózdelip otyr», - dedi mınıstr.
Onyń atap ótýinshe, kelisimdi iske asyrý Reseıdiń ishki sý joldary arqyly ashyq teńizderge qazaqstandyq flottyń shyǵýyn qamtamasyz etýge múmkindik beredi.
«Jaqyn arada Qara jáne Jerorta teńizi porttary arqyly 350 myń tonnaǵa deıin eksporttyq-ımporttyq jáne tranzıttik tasymaldaý kólemin ulǵaıta alatyn bolamyz. 2018 jyly qazaqstandyq saýda flotymen osy marshrýt boıynsha shamamen 55 myń tonna júk tasymaldandy», - dedi Jeńis Qasymbek.
Budan basqa, kelisimdi qabyldaý Qazaqstan men Reseı arasyndaǵy Ertis ózeni arqyly tasymaldaýdy, onyń ishinde Qazaqstan arqyly Qytaıǵa deıingi tranzıtti damytý úshin qolaıly jaǵdaılar jasaıdy.
«2018 jyly Qazaqstan men Reseı arasyndaǵy Ertis ózeniniń boıyndaǵy júkter aınalymynyń jalpy kólemi 261,6 myń tonnany qurady. Kemeler munaı ónimderin, koks, qum jáne qıyrshyq tastardy, shaǵyltasty, aǵashty, tuzdy tasymaldady. Jalpy, ózen boıymen, onyń ishinde Qytaıǵa tranzıt baǵytymen 2023 jylǵa qaraı júk tasymaldaý kólemin 1 mln tonnaǵa deıin jetkizý josparlanýda», - dedi ol.
