Qazaqstandyq fılm Shanhaı kınofestıvaliniń negizgi baıqaýyna qatysyp jatyr
ALMATY. QazAqparat - Qytaıda ótip jatqan Shanhaı halyqaralyq kınofestıvaliniń aıasynda Ermek Tursynovtyń «Shyraqshy» kórkem fılminiń álemdik tusaýkeseri ótti, dep habarlaıdy QazAqparat tilshisi.
Qazaqstandyq kartına festıvaldiń negizgi baıqaý baǵdarlamasyna qatysady. Ol Qazaqstan Respýblıkasy Mádenıet jáne sport mınıstrliginiń tapsyrysymen «Qazaqfılm» AQ jáne «Tursunov Film» kompanııasymen birge túsirilgen.
«Shyraqshy» fılminiń tusaýkeserine oraı Shanhaıda baspasóz máslıhaty ótti. Oǵan «Qazaqfılm» AQ-nyń birinshi vıtse-prezıdenti Serik Jubandyqov, fılmniń rejısseri Qanat Tórebaı, jelilik prodıýser Dıana Áshimova jáne fılmdegi basty akter Murat Muqajanov qatysty.
Serik Jubandyqov festıval qonaqtaryn quttyqtap, Qazaqstan men Qytaı arasyndaǵy yntymaqtastyq týraly áńgimeledi. Prodıýser Qanat Tórebaı fılmniń túsirilimi, tarıhy jóninde aıtyp berdi. Murat Muqajanov negizgi keıipkerdiń beınesin somdaýdaǵy ereksheliktermen bólisti. Al jelilik prodıýser Dıana Áshimova qazaqstandyq kıno alǵash ret Shanhaı kınofestıvaliniń negizgi baıqaýyna qatysyp jatqanyn aıtty.
Fılm soǵystan oralǵan jaýyngerdiń tarıhyn baıandaıdy. Oǵan nemis qarııasy kınoapparat syılaıdy. Soldat ómiriniń sońyna deıin sol kınoproektormen aıyrylmaı júredi.
Shanhaı festıvali Qytaıdaǵy eń iri kınofestıval. Halyqaralyq qazylar alqasyn belgili túrik rejısseri, Kann kınofestıvaliniń Altyn Palmalyq bólimshesiniń laýreaty Nýrı Bılge Djeılan basqarady. Shara 24 maýsymǵa deıin jalǵasady.
1993 jyly qazan aıynda munda tuńǵysh ret 33 eldiń 167 fılmi kórsetilgen. Oǵan 300 myń kórermen kelip, qazylar alqasynyń quramynda Karen Shahnazarov pen Olıver Stoýn boldy. 2001 jylǵa deıin festıval eki jyl saıyn ótkizildi. Keıin jyl saıyn uıymdastyrý sheshimi qabyldandy. 
