Qazaqstandyq fılm Shanhaı halyqaralyq kınofestıvalinde kórsetiledi

BEIJІŃ. QazAqparat – Rejısser Ádilhan Erjanovtyń «Atbaı shaıqasy» fılmi 25 shilde men 2 tamyz aralyǵynda ótetin XXIII Shanhaı halyqaralyq kınofestıvalinde kórsetiledi, dep habarlaıdy QazAqparat festıvaldiń uıymdastyrý komıtetine silteme jasap.

«Atbaı shaıqasy» fılmi Shanhaı kınofestıvalinde Shanghai International Film Festival (SIIF) Highligts – Viva La Festival sanaty boıynsha tańdap alyndy.

Festıvaldi bastapqyda 2020 jyldyń 13-22 maýsymy aralyǵynda ótkizý josparlanǵan bolatyn, alaıda COVID-19 pandemııasyna baılanysty uıymdastyrýshylar bul sharany keıinge qaldyrdy.

Qytaı megapolısiniń turǵyndary men qonaqtary «Atbaı shaıqasy» fılmin 25 shilde, 1 jáne 2 tamyz kúnderi Shanhaı qalasynyń úsh kınoteatrynan tamashalaı alady.

Fılmniń annotatsııasynda baıandalǵandaı, bul kartına jeńimpazdary anyqtalyp qoıǵan MMA aralas jekpe-jek týrnırine qatysýǵa sheshim qabyldaǵan kóshe buzaqysy Atbaı jaıynda. Biraq Atbaı jeńýge bel býady. Óıtkeni oǵan bul jeńis jańa ómirdi bastaýǵa, úlken sportqa oralyp, súıikti áıelin qaıtarýǵa múmkindik beredi.

Shanhaı halyqaralyq kınofestıvali – halyqaralyq kınoprodıýserler qaýymdastyǵy federatsııasynyń akkredıtinen ótken Qytaıdyń iri kınofestıvali.

1993 jyly qazan aıynda munda tuńǵysh ret 33 eldiń 167 fılmi kórsetilgen. 2018 jyly 21-kınofestıvalde 108 eldiń 3447 fılmi kópshilik nazaryna usynyldy.

Shanhaı kınofestıvaliniń bas júldesi – «Altyn kýbok».