Qazaqstandyq fılm Serbııada arnaıy júlde aldy
ASTANA. QazAqparat - Sh.Aımanov atyndaǵy «Qazaqfılm» AQ túsirgen «13 shaqyrym» derekti fılmi Serbııanyń Krýshevats qalasynda ótken «Rýhy bıik» («Sılnye dýhom») Halyqaralyq pravoslavıelik fılmder festıvalinde arnaıy júldemen marapattaldy. Fılmniń rejısseri - Vladımır Tıýlkın, dep habarlaıdy QazAqparat.
QR Mádenıet jáne sport mınıstrliginiń tapsyrysymen túsirilgen «13 shaqyrym» derekti fılmi zaǵıp jan Serik Bodanbaev týraly baıandaıdy. Qystaýdan óz aýylyna qaraı bet alǵan basty keıipker óz ómiriniń eleýli sátterin eske alyp, boıyndaǵy qundylyqtardyń syryn ashady.
«Bul, bizdiń kartınanyń úshinshi júldesi. Osyndaı jetistikterge jetip otyrǵanymyzǵa óte qýanyshtymyz. Festıvaldiń uıymdastyrýshylaryna jáne fılmdi tamashalaýǵa kelip, basty keıipkerdiń ómiri týraly óz oılarymen bólisken kórermenderge alǵysymdy bildiremin», - dedi festıvalde óz fılmin tanystyrǵan rejısser Vladımır Tıýlkın.
Esterińizge sala ketsek, byltyr «13 shaqyrym» fılmi Brazılııada ótken «Eńserý» («Preodolenıe») Halyqaralyq kınofestıvalinde arnaıy júldege jáne Ekaterınbýrg qalasynda ótken «Reseı» HHVІІІ derekti kıno festıvalinde qazylar alqasynyń arnaıy júldesine ıe boldy.
Tıýlkın Vladımır Vıktorovıch - kınorejısser, aqyn. «Platınaly Tarlan» táýelsiz syılyǵynyń laýreaty, Qazaqstan kınematografıster odaǵynyń múshesi. Eýrazııa Akademııasynyń múshesi. Lenıngrad memlekettik teatr, mýzyka jáne kınematografııa ınstıtýtynyń túlegi. Sondaı-aq ol KSRO Memkıno joǵarǵy kýrsyn (G.Chýhraıdyń sheberligi boıynsha) bitirgen. V.Tıýlkınniń ondaǵan derekti kınosy bar. Onyń fılmderi halyqaralyq beldi kınofestıvalderge qatysyp, júldeler alǵan. Amerıkanyń televızııalyq «Emmı» syılyǵyna úmitker bolǵan («Opyt kresta» fılmi úshin, 1997).
