Qazaqstandyq fılm Reseıdegi Halyqaralyq ádebıet jáne óner festıvalinde «Úzdik debıýt» atalymy boıynsha jeńimpaz dep tanyldy
ALMATY. 19 naýryz. QazAqparat /Erlik Erjanuly/ - 10-16 naýryz kúnderi Reseıdiń Gatchına qalasynda ótken XVII Halyqaralyq ádebıet jáne óner festıvalinde qazaqstandyq fılm júldeger boldy. Oǵan bıyl elimizden Mirǵalym Esirkepov óziniń «Adamǵa qansha jer kerek?» dep atalatyn alǵashqy tolyqmetrajdy fılmimen qatysqan bolatyn.
Bul óner dodasynda Reseı Federatsııasynyń halyq artısi Igor Maslennıkov bastaǵan qazylar alqasy tórelik jasaǵan bolatyn. Olar 80 fılmniń arasynan «Adamǵa qansha jer kerek?» fılmin «Úzdik debıýt» atalymy boıynsha jeńimpaz dep tanydy. Bul buǵan deıin derekti fılmderi úshin «Altyn juldyz» syılyǵyn ıelengen M. Esirkepovtyń shetelden alǵan alǵashqy júldesi bolyp otyr.
«Lev Tolstoı áńgimesiniń jelisinde túsirilgen dramalyq bul fılm «Ar prodakshn» prodıýserlik ortalyǵynyń qatysýymen 9 kúnniń ishinde túsirildi. Túsirilim jumystary byltyr Almaty oblysynyń Jambyl aýdanyndaǵy Uzynaǵash aýyly mańynda jasaldy. Bıylǵy jyly ǵana montaj jumystary tolyq aıaqtalǵan fılmniń áli resmı tanystyrylymy ótken joq. Endi oǵan taǵy bir sebep tabylyp otyr», - deıdi Mirǵalym Esirkepov.
