Qazaqstandyq fılm Reseıde júldeli boldy
ASTANA. QazAqparat - Qazaqfılm túsirgen «Jigitter ony Batıa dep ataıdy» derekti fılmi Sevastopol qalasynda ótken derekti fılmderge arnalǵan «Pobedılı vmeste» XIV Halyqaralyq kınofestıvalinde qazylar alqasynyń arnaıy júldesin aldy, dep habarlaıdy QazAqparat.
Qazaqfılmnen málim etkendeı, kınotýyndy zapastaǵy polkovnık, Aýǵan soǵysy ardageri, Chernobl AES apaty zardabyn joıýǵa belsene qatysqan, «Legıon» áskerı-patrıottyq klýbynyń negizin qalaǵan Batýr Abdýsalamovtyń ómiri men qyzmeti týraly baıandaıdy. Rejısseri - Aınur Ahmetjanova.
«Atalǵan festıval Ekinshi dúnıejúzilik soǵysqa qatysqan qalalardyń qurmetine Qyrymda turatyn Keńes Odaǵy batyrlarynyń usynysymen ashylǵan. Festıvaldiń basty maqsaty - Eýrazııa keńistiginde jáne basqa da elderdiń kınokompanııalary men telearnalarynyń ózekti máselelerge arnalǵan derekti fılmderin jınaqtaý jáne tanystyrý. Qazaqstandyq rejısserdiń derekti fılmine «Jańa tulǵanyń obrazyn ashqany úshin» dep atalatyn arnaıy júlde berildi», - delingen baspasóz qyzmetiniń resmı habarlamasynda.
Derekti fılmderge arnalǵan «Pobedılı vmeste» XIV Halyqaralyq kınofestıvaliniń bas júldesi Marta Prýs esimdi polshalyq rejısserdiń «Za granıý vozmojnogo» fılmine buıyrdy. «Eń úzdik qysqa metrajdy derekti fılm» júldesine reseılik Pavel Fattahýtdınovtyń «Pısma s voıny» fılmi qol jetkizse, «Úzdik derekti fılm» júldesin armıan rejısseri Armen Hachatrıannyń «Poslednee jelanıe» kartınasy jeńip alǵan.
Aıta keteıik, jas rejısser Aınur Ahmetjanova 1987 jyly 15 tamyzda Almaty oblysy Jambyl aýdany Qarakastek aýylynda dúnıege kelgen. 2005 jyly T.Júrgenov atyndaǵy Qazaq ulttyq óner akademııasynyń «Kıno jáne TV» fakýltetine oqýǵa túsken. Sol bilim ordasynyń magıstratýrasyn "Derekti kıno rejısseri" mamandyǵy boıynsha bitirgen. 2013 jyldan beri Aınur Ahmetjanova T. Júrgenov atyndaǵy Qazaq ulttyq óner akademııasynda jumys isteıdi.
