Qazaqstandyq fılm marapatsyz kınofestıvalde kórsetilmek
ASTANA. QazAqparat - Qazaqstandyq rejısser Venera Qaıyrjanovanyń «Tyǵylmaq» fılmi «Qıyry joq ǵalamnyń núktesi» atty kınofestıvalde ashyq aspan astynda kórsetiletin boldy, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
Kınostýdııadan habarlanǵandaı, tamyzdyń 23-26 aralyǵynda Abhazııada ótetin VIII Halyqaralyq «Qıyry joq ǵalamnyń núktesi» atty kınofestıvalde Venera Qaıyrjanovanyń «Tyǵylmaq» qysqametrli kórkem fılmi qatysyp otyr. Atalǵan festıval «ashyq aspanda ótetin festıval» retinde tanylǵan. Óıtkeni kıno kórsetilimderi tabıǵat aıasynda ótedi. Sonymen qatar, festıvaldiń ótetin jeri naqty bekitilmegen. Shara jyl saıyn túrli elde ótedi.
«Bizdiń festıval ádeıi ádilqazylar men marapattan bas tartqan. Demek ár qatysýshyny daralaý degen joq. Festıval aıasynda kórermenge usynylyp otyrǵan fılmderdiń barlyǵy da birdeı tereń qabyldanyp, ár týyndynyń avtoryn basqa áriptesterimen deńgeıles dep uǵynady»,- deıdi uıymdastyrýshylar.
Zamanaýı qalalyq órkenıetten aýlaq jerde ótýi kınokartınalarǵa erekshe atmosfera syılaıdy. Kınonyń dara óner ekenin dáleldeý úshin, fılmderdi ashyq aspan aıasynda úlken ekranda kórsetemiz», - degen «Qıyry joq ǵalamnyń núktesi» uıymdastyrýshylary óz formattaryn osylaı túsindiredi.
Venera Qaıyrjanova fılminiń festıvalderge ótkenine qýanatynyn atap ótti.
«Qıyry joq ǵalamnyń núktesi» festıvali erekshe - munda marapattar joq, barlyǵy da teń. Menińshe, bul óte jaqsy saıasat. Jáne de festıvaldiń ár elge kóshetini de unaıdy - máselen bıyl tamasha tabıǵatymen tanylǵan Abhazııa taýlarynda ótedi. Qatysýshylar taý bókterinde palatkalarda túneıdi. Tún aýǵan shaqta, aspan astynda fılmderdi tamashalaıdy. Bul batyldyq pen qyzyqty oqıǵalarǵa jeteleıdi», - dedi Venera Qaıyrjanova.
Aıta keterligi, «Tyǵylmaq» fılmi balalyq shaqtary kelmeske ketip bara jatqan eki kishkentaı qurby týraly baıandaıdy. Bıyl atalǵan fılm 71-shi Halyqaralyq Kann kınofestıvalinde Short Film Corner aıasynda kórsetilgen bolatyn.
