Qazaqstandyq fılm Qazandaǵy kınofestıvalge qatysady
ASTANA. QazAqparat - Sh.Aımanov atyndaǵy «Qazaqfılm» AQ túsirgen qysqametrajdy «Asan» fılmi 2018 jyldyń qyrkúıektiń 4-6 aralyǵynda ótetin H Halyqaralyq Qazan kınofestıvaliniń konkýrstyq baǵdarlamasyna enip otyr, dep habarlaıdy QazAqparat Sh.Aımanov atyndaǵy «Qazaqfılm» kınostýdııasyna silteme jasap.
Atalǵan jastar kınofestıvali halyqaralyq mártebesi bar Qazan musylman kınosy kınofestıvali aıasynda ótedi. Onda kórkem, derekti jáne anımatsııalyq fılmder baq synaıdy. Festıvaldiń quryltaıshysy Tatarstan Respýblıkasynyń Mádenıet mınıstrligi. Uıymdastyrýshylar quramy ádettegideı Qazan memlekettik mádenıet ınstıtýty men Tatarstan kınematografıster Keńesinen turady.
Rejısser Berik Jahanovtyń «Asan» kartınasy ákesin kópten beri kórmegen, alaıda qazasyna jolǵa shyqqan jetkinshek týraly sóz etedi.
«Fılmim kınofestıvalge qatysyp jatqanyna qýanyp otyrmyn. Budan da basqa jetistikterge qol jetkizemin dep úmittenemin», - dedi fılmniń rejısseri Berik Jahanov.
Esterińizge sala keteıik, «Asan» fılmi bıyl 71-shi Kann Halyqaralyq kınofestıvali aıasynda ótetin, álemniń túkpir-túkpirinen jınalǵan qysqa metrajdy fılmderge arnalǵan Short Film Corner baǵdarlamasynda kórsetilgen.
Sonymen qatar, H Halyqaralyq Qazan kınofestıvaliniń baıqaýdan tys baǵdarlamasynda Sh.Aımanov atyndaǵy «Qazaqfılm» kınostýdııasy óndirgen - rejısser Adaı Ábildınovtiń «Kúltegin» jáne rejısserler - Turdybek Maıdan men Tilek Tóleýǵazynyń «Muzbalaq» atty tolyq metrajdy anımatsııalyq fılmderiniń kórsetilimi ótetini belgili boldy.
