Qazaqstandyq fılm Qazandaǵy kınofestıvalde jeńiske jetti
QAZAN. QazAqparat - XIV Qazan halyqaralyq kınofestıvaliniń bas júldesin («Úzdik tolyq metrajdy fılm» nomınatsııasy) qazaqstandyq rejısser Ádilhan Erjanovtyń «Laskovoe bezrazlıchıe mıra» dramasy jeńip aldy, dep habarlaıdy QazAqparat.
Reseıdegi QR Elshiligi habarlaǵandaı, Qazaqstan men Frantsııanyń birlesip túsirgen teletýyndysy 2018 jyldyń mamyrynda Kann kınofestıvalinde alǵash ret usynylyp, ondaǵan álemdik kınoforýmnyń qazylar alqasyn tánti etken bolatyn.
Á.Erjanovtyń fılmi Qazan kınofestıvalinde «festıvaldik sapardy» aıaqtap, 20 qyrkúıekte Qazaqstanda jáne birqatar Eýropa elderinde prokatqa shyǵady.
Kınoǵa sulý, biraq kedeı qyz Saltanat pen Qýandyqtyń mahabbaty arqaý bolǵan. Saltanatty dáýletti aǵaıyna jiberedi. Aǵaıy ony bıznes seriktesine turmysqa bermek bolady. Qýandyq súıiktisiniń artynan úlken qalaǵa attanady.
Týyndyda bas keıipkerlerdiń úlken qaladaǵy qıyndyqtary beınelengen.
