Qazaqstandyq fılm Kanadada kórsetiledi
ASTANA. QazAqparat - Rejısser Emır Baıǵazınniń «Ózen» fılmi Toronto International Film Festival konkýrstyq «Platforma» baǵdarlamasyna qatysyp otyr. Bul týraly QazAqparat Qazaqfılmniń baspasóz qyzmetine silteme jasap habarlaıdy.
Atalǵan fılmnen bólek, álemniń ár qıyrynan «úzdik rejısserlik kózqarasty kórsetetin joǵary deńgeıli kórkem» 11 avtorlyq kartına baq synap otyr. «Aslan Trılogııasynyń» úshinshi bólimi shalǵaıdaǵy qazaq aýylynda turatyn baýyrlardyń úıine qalalyq kisiniń kelýimen ómirlerinde ózgeris paıda bolatyny týraly baıandaıdy. Kartınanyń túsirilimderi (Qazaqstan, Norvegııa jáne Polshanyń birlesken óndirisi ) 2017 jyly Almaty oblysynda ótken. Fılmge Baıǵazın trılogııasynyń buǵan deıingi bólimderindegideı áýesqoı akterler túsken jáne ózi qoıýshy-operator retinde jumys atqarǵan.
«Platformanyń» bıylǵy qazylar alqasy músheleri nemis kınosynyń ańyzy Margareta fon Trotta, vengerlik rejısser Bela Tarr jáne koreılik rejısser ári jazýshy Lı Chhan Donnan turady.
Konkýrstyq «Platforma» baǵdarlamasy 2015 jyly engizilgen, onda kórkem fılmder men qatar derekti kıno da qatysady. Jeńimpaz atanǵan fılm rejısserine 25 000 kanadalyq dollar beriletin bolady. Ashylý saltanatynda Djeımı Bellanyń «Donnıbrýk» dramasy kórsetilip, Karolına Poggı men Djonatan Vaıneldiń debıýttik «Djessıka máńgilik» kartınasymen festıval jabylmaq. Atalǵan baǵdarlamanyń qataryna basty rolde Nıkol Kıdman oınaıtyn «Joıýshy» fılmi de kirgen.
Torontodaǵy Halyqaralyq kınofestıval qyrkúıektiń 6 men 16 aralyǵynda ótedi. Esterińizge sala keteıik, kartınanyń óndirisine QR Mádenıet jáne sport mınıstrligi, Sh.Aımanov atyndaǵy «Qazaqfılm» kınostýdııasy, Emir Baigazin Production, Norsk Filmproduksjon (Norvegııa) jáne Madants (Polsha) qatysqan.
