Qazaqstandyq fılm Halyqaralyq kınofestıvaldiń negizgi konkýrsyna iriktelip alyndy
ASTANA. QazAqparat - «Qazaqfılm» kınostýdııasynyń «Tańsári» tolyqmetrajdy kórkem fılmi 19-26 sáýir aralyǵynda Máskeýde ótetin 40-shy Máskeý halyqaralyq kınofestıvaliniń negizgi konkýrsyna iriktelip alyndy. Bul týraly Qazaqstannyń Reseıdegi Elshiliginiń resmı saıtynda aıtyldy, dep habarlaıdy QazAqparat.
«Tańsári» fılmin QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen. Rejısseri - Ádilhan Erjanov.
Fılmniń basty keıipkeri - ózin tappaı júrgen, bitpeıtin aıazdan sharshaǵan er adam. Keıipker ómirin qorqýmen ótkeredi. Ózin áldebir qudaı - múmkin tún qudaıy ylǵı baqylap turǵandaı kórinedi jáne bundaı sezimderdi ata-babalary basynan ótkergen dep paıymdaıdy.
«Menińshe, búgingi álemde bolyp jatqan dúnıelerdi mıfologııalyq oılaý arqyly ǵana naqty túsindirýge bolady. Ratsıonalızmniń endi qajeti shamaly. Jańa kınematograftyń arhetıptik kúshi - folklor negizinde jatyr. Bizdiń mádenıet mınıstrligi avtorlyq kınoǵa qoldaý kórsetip otyrǵanyna qýanamyn, negizi solaı bolýy tıis. Meniń shyǵarmashylyǵyma túsinistikpen qaraǵan mınıstrlikpen yntymaqtastyqty jalǵastyra bermekpin, óıtkeni meniń fılmime tsenzýralyq shekteý qoıylǵan joq», - dedi fılmniń rejısseri Ádilhan Erjanov.
Sonymen qatar atalǵan festıvaldiń «Sheberler» baǵdarlamasynda «Qazaqfılm» kınostýdııasynyń qatysýymen, otandyq rejısser Serik Aprymov túsirgen «Ákege qońyraý shalý» atty fılm kórsetiletin bolady.
Esterińizge sala ketsek, bul kartına Qazaqstan kınosynshylar qaýymdastyǵy uıymdastyrǵan «Synshylar tańdaýy» kınojúldesinde eki birdeı júldege - «Úzdik rejısser» jáne «Ekinshi plandaǵy úzdik er adam róli» (akter Erbolat Ospanqulovqa tabystaldy) qol jetkizdi. Odan bólek, atalǵan týyndy Reseıdiń «Nıka» atty kınojúldesine úmitker bolǵan.
