Qazaqstandyq fılm halyqaralyq festıvalge qatysady
NUR-SULTAN. QazAqparat - Jánibek Jetirýovtyń «Shyńyraý» atty kórkem fılmi halyqaralyq «FIFF» kınofestıvaliniń konkýrstyq baǵdarlamasyna qatysady, dep habarlaıdy QazAqparat.
«Qazaqfılm» kınostýdııasynyń baspasóz qyzmetiniń habarlaýynsha, festıval 2019 jylǵy sáýirdiń 18-26 aralyǵynda Irannyń astanasy Tegeranda ótedi.
Ábish Kekilbaevtyń «Shyńyraý» povesiniń jelisi boıynsha túsirilgen kartına qudyq qazýshy Eńseptiń oqıǵasyn baıandaı otyryp, menmendik, baqtalastyq, mahabbat, dostyq, qastandyq syndy adamǵa tán qubylystardy kóteredi.
«Fılm tek kınofestıval talaptaryna ǵana emes sonymen qatar kórermenderdiń de kóńilinen shyǵatynyna senimdimin. Sebebi fılmge arqaý bolǵan taqyryp tyń jáne qupııa men syrǵa toly kasıetti Mańǵystaýdyń ǵajaıyp tabıǵaty shyǵarmanyń boıaýyn qanyqtyryp, oǵan tereń astar júktedi», - dedi fılmniń rejısseri Jánibek Jetirýov.
Atalǵan fılm Bangladeshtiń Dakka qalasynda ótken 17-shi HKF úzdik operatorlyq jumys nomınatsııasy boıynsha jeńiske jetken.
Aıta ketsek, Fajr International Film Festival (FIFF) Iran kınosynyń damýyna úlken áser etken, basqa eldermen mádenı almasýǵa yqpal etetin iri kınofestıval. Negizi 1982 jyly qalanǵaly beri festıvaldiń qazylar alqasy qatarynda álem kınematografynyń beldi tulǵalary - Folker Shlendorf, Kshıshtof Zanýssı, Bela Tarr, Agneshka Holland, Andreı Zvıagıntsev jáne Rústem Ibragımbekov bolǵan.
