Qazaqstandyq fılm Germanııadaǵy kınofestıvaldiń nazaryna ilikti
ASTANA. QazAqparat - Sh.Aımanov atyndaǵy «Qazaqfılm» AQ qarasty «Debıýt» shyǵarmashylyq-óndiristik birlestiginde túsirilgen «Hat» fılmi Germanııadaǵy «Oberhaýzen» kınofestıvaliniń negizgi konkýrstyq baǵdarlamasyna iriktelip alyndy, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
64-shi halyqaralyq «Oberhaýzen» qysqametrajdy fılmder kınofestıvali (Internationale Kurzfilmtage Oberhausen) mamyr aıynyń 3-8 aralyǵynda ótedi. Jas rejısser Ádil Musataev túsirgen debıýttik kartına anasyna hat jazýdy armandap júrgen balalar úıiniń tárbıelenýshisi týraly baıandaıdy.
«Fılmdegi oqıǵa shynaıy ómirden alynǵan. Bul oqıǵa Óskemen qalasyndaǵy balalar úıinde bolǵan eken. Osy oqıǵany tanysymnan estı sala, daıyn dramatýrgııanyń bar ekenin ańǵaryp, ony kıno tiline salyp kórmek boldym. Osyndaı beldi kınofestıvalde fılmniń tusaýy kesiletinine óte qýanyshtymyn,- dedi rejısser Ádil Musataev.
«Oberhaýzen» kınofestıvaliniń resmı saıtynyń málimeti boıynsha, bıyl festıvaldiń negizgi halyqaralyq baıqaýyna 33 elden 53 qysqametrajdy fılmder kórsetiledi. Olardyń arasynda AQSh, Qytaı, Mysyr, Argentına, Brazılııa, Úndistan, Frantsııa, Japonııa, Reseı, Qazaqstan, Fınlıandııa jáne taǵy da basqa elderden fılmder bar. Jalpy osy baıqaýǵa 6 myńǵa jýyq fılm usynylǵan.
Aıta keterligi, alpys jyldyq tarıhy bar «Oberhaýzen» halyqaralyq qysqametrajdy fılmder kınofestıvali - qysqa metrli fılmderge arnalǵan eń iri baıqaýlardyń biri (1954 jyldan beri ótkizilip keledi).
Baıqaý - dúnıejúzinen jınalǵan kınogerlerge kıno tóńireginde áńgime quryp, ony talqylaýǵa, jańa trendter men esimderdi ashýǵa keń múmkindik beretin birden bir festıval. Dál osy festıval arqyly Martın Skorseze, Djordj Lýkas, Roman Polanskı syndy basqa da kıno maıtalmandardyń juldyzy janǵan.
