Qazaqstandyq fılm FEST halyqaralyq festıvaline qatysady
ASTANA.QazAqparat - Qazaqstandyq belgili rejısser Serik Apyrymovtyń «Baýyr» fılmi 42-shi FEST Halyqaralyq kınofestıvaliniń «Álemdik kıno panoramasy» baǵdarlamasyna qatysady, dep habarlaıdy «Qazaqfılm» AQ resmı saıty.
Atamysh kınofestıval 28 aqpan men 9 naýryz aralyǵynda Serbııa eliniń astanasy Belgradta ótedi.
FEST Halyqaralyq kınofestıvali ońtústik-shyǵys Eýropanyń mádenı ómirindegi basty oqıǵalardyń biri bolyp sanalady. Qyryq jyldan astam tarıhy bar bul sharaǵa shamamen tórt mıllıonǵa jýyq kórermen qatysyp, 4000-nan astam fılm kórsetilgen.
Bıyl FEST festıvali aıasynda kópshilik nazaryna 30 eldiń 75 kınotýyndysy usynylatyn bolady. Serik Apyrymovtyń «Baýyr» fılmi 1 jáne 3 naýryz kúnderi «Fontana» kınoteatrlary men «Belgradtyń mádenı ortalyǵynda» kórsetilmek.
«Baýyr» fılminiń álemdik premerasy Venetsııadaǵy 70-shi Halyqaralyq kınofestıvaldiń aıasynda ótti. Іzinshe kartına «Eýrazııa» IX halyqaralyq kınofestıvaliniń negizgi konkýrstyq baǵdarlamasynda kórsetilip, birden úzdik rejıssýra marapatyn jáne NETPAK júldesin ıelendi. Ótken jylǵy kúzde fılm Avstrııada ótken Viennale halyqaralyq kınofestıvaline qatysqan.
Aǵymdaǵy jyldyń basynda «Baýyr» fılmi Geteborgte ótken 37-shi Halyqaralyq kınofestıvaldiń «Bes qurlyq» baǵdarlamasy men Frantsııada ótken Ciné Junior balalar men jasóspirimderdiń 24-shi Halyqaralyq kınofestıvaliniń negizgi konkýrstyq baǵdarlamasyna qatysqan. Sondaı-aq osy aqpan aıynda atalmysh týyndy Santa-Barbarada ótken 29-shy Halyqaralyq kınofestıvalde «Shyǵys Eýropa elderiniń úzdik fılmi» atandy.
