Qazaqstandyq fılm Anapadaǵy kınofestıvalde júldege ıe boldy
ALMATY. QazAqparat - Qazaqstannyń eńbek sińirgen ártisi, marqum Vladımır Tolokonnıkovke «Kınoshok» reseılik kınofestıvali nomınatsııalarynyń biriniń syılyǵy tabystaldy, dep habarlaıdy QazAqparat tilshisi.
Festıvaldyń resmı saıtynda atap ótilgendeı, «Tolyqmetrajdy fılm» atalymynda úzdik er adam róline «Ded» fılmindegi eńbegi úshin Vladımır Tolokonnıkov laıyq dep tanyldy. Fılmdi 90-jyldardaǵy «Toǵysqan taǵdyrlar» serıaly arqyly tanylǵan rejısser Alekseı Shemes túsirgen. A. Shemes festıvaldiń «Úzdik rejıssýra» atalymynda jeńiske jetti.
Qysqametrajdy fılmder konkýrsynyń «Qazirgi jasóspirimderdiń ózekti problemalaryn ekranda kórsetý» baǵytyndaǵy arnaıy syılyǵy qazaqstandyq rejısser Álimjan Qudabevqa «Marattyń vıdeosy» atty fılmi úshin berildi.
«Kınoshok» - TMD jáne Baltyq boıy elderiniń ashyq festıvali. Ol 1992 jyldan beri Reseıdiń Anapa qalasynda ótkizilip keledi.
