Qazaqstandyq fılm álemniń 10-nan astam júldesine ıe boldy

ALMATY. QazAqparat - Qazaqstanda Ádiljan Erjanovtyń «Laskovoe bezrazlıchıe mıra» kınokartınasy qazaqstandyq prokatqa shyǵady, dep habarlaıdy QazAqparat tilshisi.

Atalǵan fılmde aýyldan kelgen ǵashyqtardyń qaladaǵy ómiri týraly aıtylady.

Kınotaspa 22 qarashada Almaty, Astana, Shymkent, Atyraý jáne Qaraǵandy qalalarynda prokatqa shyǵady. Kórsetilim 2 kúnge sozylady.

«Bul - eń uly sezim mahabbat týraly fılm. Qazirgi Qozy men Baıannyń tarıhy. Kıno Almaty oblysynda 1 aı shamasynda túsirilgen», - dedi atalǵan týyndynyń rejısser Ádiljan Erjanov.

Bul kıno buǵan deıin frantsýz kórermenderine kórsetilgen bolatyn.

«Parıjde alǵashqy demalysta 15 000 bılet satyldy. Suranystyń kóptiginen kıno Frantsııanyń basqa da qalalaryna prokatqa shyqty. Fılmdi frantsýz pýblıkasy birden qabyldady. Bul avtorlyq fılm paıda tabý úshin túsirilmegen bolatyn. Biraq, óte sátti shyqty. Kórermen tarapynan suranys kóp bolǵan soń tabysty bola bastady. Fılm jarty jylda 20 elde kórsetilip, 10-nan asa marapat utyp aldy»,  - dedi prodıýser Serik Ábishev.

Aıta ketý kerek, kartınanyń álemdik premerasy 71-Kann kınofestıvaliniń «Erekshe kózqaras» atalymynda ótken bolatyn.

Odan keıin Karlovy Vary, Ierýsalım, Armenıı («Altyn órik»), Frantsııa (La Rochelle) elderindegi baıqaýlarǵa qatysty.

Almaty film festival baıqaýynda bul fılm eki birdeı atalym boıynsha jeńimpaz atandy.

Basty rólderde Qýandyq Dúısembaev, Dınara Baqtybaeva oınaıdy.