Qazaqstandyq fermerler jún óndirisine múddeli emes - maman
Almaty qalasy kásipkerler palatasynyń alańynda Ózbekstannyń «Ýzcharmsanoat» bylǵary-aıaq kıim jáne jún-teri kásiporyndary qaýymdastyǵy tóraǵasynyń orynbasary Adham Mýıdınov bastaǵan delegatsııasymen bıznes-kezdesý ótti. Іs-sharaǵa Qazaqstannyń jeńil ónerkásip qaýymdastyǵy, Almaty óńirlik palatasynyń ókilderi men kásipkerler qatysty.
Kezdesýde kólik-logıstıka salasyndaǵy yntymaqtastyqty keńeıtý, toqyma, bylǵary galantereıa, qurylys materıaldary, tamshylatyp sýarý salalaryndaǵy saýda-ekonomıkalyq yntymaqtastyqty damytý máseleleri talqylandy. Almaty kásipkerler palatasy apparatynyń basshysy Tımýr Bekeev Qazaqstan men Ózbekstan arasyndaǵy yntymaqtastyq ǵasyrlar boıy jalǵasyp jatqanyn, bul baılanysty jańa deńgeıge shyǵarý qajettigin aıtty.
«Atameken» Ulttyq kásipkerler palatasy qazaqstandyq kompanııalarmen iskerlik jáne saýda baılanystaryn ornatýda bıznestiń senimdi seriktesi bolady», - dep atap ótti Tımýr Bekeev.
Qazaqstannyń jeńil ónerkásip kásiporyndary qaýymdastyǵynyń quryltaıshysy Natalıa Ahshabaeva eki eldiń saladaǵy yntymaqtastyǵynyń zor múmkindikterin atap ótti. Qazir qaýymdastyq quramynda toqyma, tigin, aıaq kıim jáne teri baǵyttaryn biriktiretin 124 kompanııa bar. Qazaqstanda bul salada 1 100 kompanııa jumys isteıdi, sonyń ishinde 980 kompanııa – shaǵyn bıznes ókili.
«Bul jeńildetilgen salyq rejımi bar jeke kásipkerler úshin yńǵaıly. Іri kompanııalar negizinen úlken tapsyrysqa baǵyttalǵan, qazir naryqtaǵy jaǵdaı óte qıyn. Ókinishke qaraı, qazaqstandyq jeńil ónerkásipte Ózbekstandaǵydaı memlekettik qoldaý men nazar azdaý. Bizdiń óndiris óńdeý ónerkásibi kóleminiń tek 1%-yn ǵana quraıdy», - deıdi Natalıa Ahshabaeva.
Qaýymdastyq quryltaıshysynyń aıtýynsha, Qazaqstanda toqyma óndirisi boıynsha klaster qurý nemese aıaq kıim fabrıkasyn tolyq tsıkldi ashý múmkin emes. Elde fermadan fabrıkaǵa deıin jetkizý tizbegi buzylǵan. Fermerler jún óndirisine múddeli emes, teri qabyldaý pýnktteri jumys istemeıdi. Bizdiń tarıhı qolónerimiz – bylǵary óndirý, teri ıleý, qoı júnin óńdeý joǵalǵan.
«Statıstıkalyq málimetterdi keltire alamyn: jyl saıyn biz 450 tonna maqta, 25-37 myń tonna jún jáne 7,5 mıllıon teri óndiremiz. Biraq, daıyn ónimniń 95%-yn biz ımporttaımyz, sebebi shıkizat is júzinde qaıta óńdelmeıdi, barlyq logıstıka buzylǵan. 2019 jyly 36 myń tonna jún jınadyq, 27 myń tonna joıyldy. Jaı jınalyp, bosqa tastaldy. Jún durys saqtalmaǵandyqtan shirip ketti. Bizdiń fermerler jeńildikti qoıdyń sanyna ǵana alady, al onyń terisi men júnin tapsyrǵany úshin oǵan eshqandaı sýbsıdııa berilmeıdi», - dep málimdedi qaýymdastyqtyń quryltaıshysy Natalıa Ahshabaeva
Sonymen qatar, ol qazir qaýymdastyq qarjy jáne ındýstrııalyq damý mınıstrlikterimen toqyma óndirisiniń tolyq tsıkliniń tizbegin qalpyna keltirý qajettiligi, júndi sýbsıdııalaý, logıstıka, saqtaý, tapsyrý máseleleri týraly kelissózder júrgizip jatqanyn tilge tıek etti.
Ózbekstannyń «Ýzcharmsanoat» bylǵary-aıaq kıim jáne jún-teri kásiporyndary qaýymdastyǵynyń tóraǵasy Adham Mýıdınov memlekettik deńgeıdegi júıeli qoldaý bylǵary-aıaq kıim jáne jún-teri baǵyttaryn ózbek ekonomıkasynda eń jyldam damyp kele jatqan baǵyttardyń birine aınaldyrǵanyn aıtty.
Kezdesý barysynda eki eldiń kásipkerleri yntymaqtastyq jáne daıyn ónimdi Qazaqstanǵa tikeleı jetkizý, sondaı-aq Almatynyń arnaıy ekonomıkalyq aımaqtarynda birlesken kásiporyndar qurý máselelerin talqylady.
Foto: aplp.kz
