Qazaqstandyq fermerler alqaptaryn úıden shyqpaı-aq basqarady

NUR-SULTAN. QazAqparat - XII Astana ekonomıkalyq forýmy aıasynda QR Aýyl sharýashylyǵy mınıstrligi BUU Azyq-túlik jáne aýyl sharýashylyǵy uıymymen birlesip, «Aýyl sharýashylyǵyn tsıfrlandyrý: naqty eginshilikten «aqyldy fermaǵa deıin» sessııasyn ótkizdi, dep habarlaıdy QazAqparat tilshisi.

Sessııa barysynda QR Aýyl sharýashylyǵy mınıstri Saparhan Omarov mıınıstrlik aýyl sharýashylyǵyn tsıfrlandyrýǵa basa nazar aýdaryp otyrǵandyǵyn aıtty. Bul óz kezeginde memlekettik basqarý protsesterin barynsha avtomattandyrý, memlekettik qyzmetterdi retteý jáne kórsetý bolyp sanalady. Bul rette fermerlerdi óndiristen bastap óz ónimderin ótkizýge deıingi protsesterin avtomattandyrýdy engizýge baǵyttaý qajet.

Máselen, qazirgi ýaqytta aýyl sharýashylyǵy sýbsıdııalaryn alý tolyq avtomattandyrylǵan júıe arqyly jumys isteıdi. Ol úshin egis alqaptaryn tolyq tsıfrlaý júrgizilgen. Endi fermerlerdiń óz alqaptaryn úıden shyqpaı-aq basqarý múmkindigi paıda boldy.

Sonymen qatar, júıeli negizde AÓK sýbektileriniń sandyq saýattylyǵyn arttyrý, fermerlerdi elektrondyq memlekettik qyzmetterdi alý, óristerdiń elektrondyq kartasyn jasaý, salalyq aqparattyq júıelermen jumys isteý, zamanaýı tehnologııalar men jańa jabdyqtardy qoldaný daǵdylaryna úıretý qajet.

Sharaǵa Swiss Re, Syngenta, Cropio, Organic Services sııaqty búkil álemdegi aýyl sharýashylyǵy úshin ınnovatsııalyq sheshimderdi belsendi túrde ilgeriletetin sheteldik kompanııalardyń ókilderi qatysty.