Qazaqstandyq fermerler alǵash ret saqtandyrý tólemin aldy
NUR-SULTAN. QazAqparat - Egis alqaptaryn qurǵaqshylyqtan saqtandyrǵan sharýashylyqtarǵa 491 mıllıon teńgeniń saqtandyrý tólemi berildi, dep habarlaıdy QazAqparat.
«Aýyl sharýashylyǵyn qarjylaı qoldaý qory» AQ baspasóz qyzmetiniń málimetine qaraǵanda, bıyl iske qosylǵan jańa saqtandyrý júıesi úıden shyqpaı-aq saqtandyrý shartyn jasasýǵa múmkindik berdi. Sonymen qatar, ósimdik sharýashylyǵymen aınalysatyn fermerler memlekettik sýbsıdııanyń kómegi arqyly saqtandyrý shyǵyndarynyń jartysyn ótep aldy.
Aıta keteıik, bıyl jyl basynan beri agroónerkásip kesheninde erikti saqtandyrý júıesi jumys isteı bastady. Bul júıeniń operatory – «QazAgro» UBH-niń enshiles kompanııasy - Aýyl sharýashylyǵyn qarjylaı qoldaý qory.
Saqtandyrý shartyn jasasýdan bastap saqtandyrý jaǵdaıyn tirkeýge deıingi protsess WWW.QOLDAU.KZ platformasyndaǵy «Agroinsurance» aqparattyq servısinde júzege asyrylady.
Aýyl sharýashylyǵy taýarlaryn óndirýshilerdi yntalandyrý, táýekelderdi azaıtý jáne salaǵa ınvestorlar tartý úshin saqtandyrý syıaqylaryn sýbsıdııalaıtyn memlekettik qoldaý qarastyrylǵan. Shart jasasqan soń fermer saqtandyrý syıaqysy somasynyń tek 50%-yn tóleıdi, qalǵan bóligi memlekettik qoldaý esebinen tólenedi.
Topyraqtaǵy ylǵal deńgeıi spýtnıktiń kómegimen anyqtalyp, monıtorıng avtomatty túrde júrgiziledi. Saqtandyrý jaǵdaıy týraly habarlama fermerdiń platformadaǵy jeke kabınetine keledi. Sodan keıin ol saqtandyrý tólemine ótinish jiberedi.
«Bıyl maýsym aıynda 60 sharýashylyq egis alqaptaryn qurǵaqshylyqtan saqtandyrdy. Saqtandyrý syıaqysy 199 mln teńgeni qurady. Onyń jartysy memlekettik sýbsıdııanyń kómegimen tólendi. Nátıjesinde 47 sharýashylyq jalpy somasy 491 mln teńge bolatyn saqtandyrý tólemine qol jetkizdi», - deıdi «Aýyl sharýashylyǵyn qarjylaı qoldaý qory» AQ caqtandyrý departamentiniń dırektory Ásel Ramazanova.
Osy júıeniń ıgiligin kórgenderdiń biri – eginshilikpen aınalysatyn qojalyqtyń basshysy Qanat Álmuhamedov. Ol bıdaı, arpa, júgeri, kúnbaǵys ósiredi. Aqmola, Qostanaı, Soltústik Qazaqstan oblystarynda egistik alqaptary bar. Fermer erikti saqtandyrý júıesi óte yńǵaıly ekenin aıtady.
«Bıyl 8 315 gektar jerimizdi saqtandyrdyq, 22,5 mıllıon teńge tóledik. Onyń jartysyn memleket sýbsıdııalady. Bizdiń aımaqtarda 60 kúnge deıin jaýyn-shashyn bolmady. Nátıjesinde, aqparattyq júıe arqyly ótinish berip, 86,5 mıllıon teńge kóleminde ótemaqy aldyq. Erikti saqtandyrý júıesi óte yńǵaıly. Barlyq operatsııa onlaın formatta ótedi», - deıdi sharýa qojalyǵynyń basshysy Qanat Álmuhamedov.
Saqtandyrý naryǵyn odan ári damyta túsý úshin WWW.QOLDAU.KZ elektrondy platformasyn jetildirip, qyzmet kórsetý qoljetimdiligin arttyrý josparlanýda.
Barlyq týyndaǵan suraqtar boıynsha «Aýyl sharýashylyǵyn qarjylaı qoldaý qory» AQ-na +7 701 543 3744 telefon nómiri boıynsha habarlasýǵa bolady.
