Qazaqstandyq faıter Qanaev Azııa chempıony tıtýlyna talasady
ASTANA. QazAqparat - Qazaqstandyq aralas jekpe-jek sheberi Ǵalymjan Qanaev K1 boıynsha Azııa chempıony tıtýly úshin aıqasady, dep habarlaıdy QazAqparat «SPORTINFORM» SAA-ǵa silteme jasap.
28 shildede Qapshaǵaıda aralas jekpe-jekten kezekti «ALASH PRIDE» týrnıri ótedi. Onyń basty aıqasynda qazaqstandyq faıter Ǵalymjan Qanaev tájik sportshysy Olım Haıtbekpen kúsh synasady. Olar aralas jekpe-jektiń K1 túrinen 81 kg salmaq sanatynda «ALASH PRIDE» tujyrymy boıynsha Azııa chempıony beldigin sarapqa salady.
Olım Haıtbek ózine tán rekord ıesi: ol buǵan deıin alty qarsylasyn tize búktirip, bir-aq ret jeńilgen.
Ǵalymjan Qanaev K1 aıasynda 6 jekpe-jek ótkizip, beseýinde jeńiske jetken, bir qarsylasyna ese jibergen. Ol sońǵy ret sáýir aıynda Shymkentte ótken «ALASH PRIDE» týrnırine qatysyp, ózbekstandyq Hýsnıdın «Mýslım» Nıshonovty nokaýtpen jeńgen.
