Qazaqstandyq farmatsevtıka ónerkásibi otandyq rynokty tek 30 paıyzǵa ǵana qamtamasyz etedi
ASTANA. Tamyzdyń 19-y. QazAqparat - Qazirgi tańda qazaqstandyq farmatsevtıka ónerkásibi otandyq densaýlyq saqtaý salasyn dári-dármektermen tek 30 paıyzǵa ǵana qamtamasyz etedi.
Bul týraly QazAqparat Indýstrııa jáne jańa tehnologııalar mınıstrliginiń baspasóz qyzmetine silteme jasap habarlaıdy.
Sarapshylardyń baǵalaýy boıynsha, 2009 jyly medıkamentterdiń aqsha kórinisindegi naryǵynyń kólemi 1 mlrd. AQSh dollaryn quraǵan. Al 2009 jyly aqysyz medıtsına kómeginiń kepildengen kólemi aıasynda dári-dármekpen qamtý kórsetkishi 45 paıyzdy qurady.
«Sonymen birge, sarapshylar 2008 jylǵa deıin otandyq farmatsııanyń ishki naryǵynyń baıqalǵan ósimi el ekonomıkasynyń kóterilýimen, demek halyqtyń ál-aýqatynyń ósýimen negizdelgenin rastap otyr. Halyq suranysynyń asa qymbat ınnovatsııalyq farmatsevtıkalyq ónimderge yǵysý shamasyna qaraı, otandyq ónerkásiptiń ishki naryqtaǵy ustanymy tómendep, salalyq baǵdarlamany ázirleý qajettiligin týdyrdy», delingen baspasóz aıǵaǵynda.
Sonymen birge, farmatsevtıkalyq salany damytý baǵdarlamasy otandyq farmatsevtıka óniminiń ishki tutyný kólemin 50 paıyzdan kem bolmaıtyndaı deńgeıge kóterýge jáne otandyq farmatsııanyń eksporttyq múmkinshiligin arttyrýǵa baǵyttalǵan sharalar keshenin usynady. Bul maqsatqa jetý jónindegi sharalar retinde otandyq óndirýshini memlekettik qoldaýdyń túrli amaldaryn qamtý josparlanyp otyr.
