Qazaqstandyq F.Harkı Astanada ótip jatqan Azııa chempıonatynyń kúmis medaline ıe boldy
ASTANA. 22 maýsym. QazAqparat - Astana qalasynda ótip jatqan aýyr atletıkadan Azııa chempıonatynyń dodasy kúnnen kúnge qyza túsýde.
Jarystyń saltanatty ashylýynan keıin erler arasynda 62 kelige deıingi salmaqtaǵy 8 sportshy synǵa tústi. Sonyń ishinde qazaqstandyq Farhat Harkı tamasha óner kórsetti.
Tartysty ótken básekede qazaqstandyq sportshyserpe kóterýde 138 kelini baǵyndyrdy. Odan keıin ziltemirdi kóterýge shyqqan London Olımpıadasynyń jeńimpazy, Koreı Halyq Demokratııalyq Respýblıkasynyń ókili Kım Ýn-Gýk jeke dara 145 kelini baǵyndyrdy.
Ekinshi jattyǵýda da Qazaqstan men Soltústik Koreıa sportshysy ózara tartysqa tústi. Julqa kóterýde Farhat Harkı 165 kelini erkin kóterdi. Al Kım Ýn-Gýk birden 170 kelige tapsyrys berip, alǵashqy múmkindiginde osy salmaqty baǵyndyra aldy. Sóıtip, jalpy esepte 315 kelini kóterdi. Al Soltústik Koreıa sportshysy ekinshi ret shyqqanda jaraqat alyp qaldy.
Al qazaqstandyq Farhat Harkı ekinshi múmkindiginde 177 kelige tapsyrys berip, qarsylasynan ozýǵa tyrysty. Eger osy salmaqty alǵanda Farhat Harkı jalpy esepte 315 kelini baǵyndyryp, altyn júldege qol jetkizetin edi. Alaıda, qazaqstandyq sportshynyń ekinshi jáne úshinshi múmkindigi sátsiz oryndaldy. Ol jalpy esepte 303 kelini kóterip, Azııa chempıonatynyń kúmis medalin utyp aldy. «Saryarqa» velotregine jınalǵan jankúıerler Farhat Harkıdiń jetistigine qýana qol soqty.
