Qazaqstandyq et shetelde suranysqa ıe

Qazaqstandyq et shetelde de suranysqa ıe bolyp otyr. Bul týraly QR Aýyl sharýashylyǵy mınıstrliginiń baspasóz qyzmeti taratqan málimetterden belgili bolyp otyr, dep habarlaıdy QazAqparat.

Mınıstrliktiń málimetterinshe, bıylǵy alty aıda qazaqstandyq aýyl sharýashylyǵy taýaryn óndirýshiler 11,8 myń tonna et pen et ónimderin, onyń ishinde 7,5 myń tonna iri qara jáne 3,6 myń tonna qoı etin eksporttaǵan.

Otandyq óndiristiń et jáne et ónimderiniń negizgi ımporttaýshylary - Ózbekstan Respýblıkasy, Qyrǵyz Respýblıkasy, Katar, Kýveıt, Birikken Arab Ámirlikteri jáne Saýd Arabııasy Koroldigi sııaqty elder bolyp tabylady.

Qazaqstandyq et óńdeýshiler aýyl sharýashylyǵy ónimderin satyp alýdy sýbsıdııalaý túrinde memlekettik qoldaý alady, jumys istep turǵan kásiporyndardy jańǵyrtýǵa jáne jańa kásiporyndar salýǵa jumsalatyn shyǵystardyń 25%-na deıin óteledi. Budan basqa, aınalym qarajatyna beriletin kredıtter boıynsha syıaqy mólsherlemesin sýbsıdııalaý tetigi engizildi. Óz kezeginde mal ósirýshilerdiń maldy óńdeýge tapsyrǵan kezdegi shyǵyndarynyń bir bóligi sýbsıdııalanady.

Jarty jyl ishinde sharýashylyqtardyń barlyq sanattarynda soıylǵan salmaǵyndaǵy barlyq túrdegi et óndirý kólemi 666,7 myń tonnany qurady, bul ótken jyldyń sáıkes kezeńimen salystyrǵanda 4,6%-ǵa artyq.

2022 jyldyń qorytyndysy boıynsha elimizde 924,4 myń tonna et óndirildi. Іshki naryq qus etin qospaǵanda, otandyq óndiris esebinen mal sharýashylyǵy ónimderimen tolyq qamtamasyz etilgen. El naryǵyndaǵy ımporttyq taýyqtyń úlesi 33% quraıdy.