Qazaqstandyq eskekshi Marııa Brovkova taǵy da álem chempıony atandy
ORAL. QazAqparat – Italııanyń Aýronzo qalasynda jasóspirimder men jastar arasynda baıdarka men kanoeda eskek esýden álem chempıonaty ótip jatyr, dep habarlaıdy QazAqparat tilshisi.
Sportty damytý dırektsııasy baspasóz qyzmetinen málim etkenindeı, batysqazaqstandyq Marııa Brovkova 18 jasqa deıingiler arasynda S-1 sanatynda 1000 metrlik saıysta 4:35.01 sekýnd kórsetkishpen aldyna jan salmady.
Majarstandyq Reka Sarkanı kúmis júldeger atansa, ózbekstandyq Shohsanam Sherzodova úzdik úshtikke ilikti.
Sonymen qatar taǵy bir qazaqstandyq Rýfına Ysqaqova 23 jasqa deıingiler arasynda S-1 sanatynda 1 myń metrge jarysýdan máre syzyǵyn ekinshi bolyp kesti.
Ol majarstandyq Borka Zagyvaıǵa ǵana jol berdi.
Bul aıtýly dodaǵa 65 elden 938 sportshy qatysyp jatyr.
BQO dene shynyqtyrý jáne sport basqarmasynan alynǵan málimetke qaraǵanda, Marııa Brovkova – jastyǵyna qaramastan, Parıj olımpıadasyna joldama alýdan úmitkerlerdiń biri.
Osy jyldyń tamyz aıynda Germanııa elinde eresekter arasynda álem chempıonaty ótedi. Qyrkúıekte Qytaıda jazǵy Azııa oıyndary bolady.
Eske sala keteıik, budan buryn qazaqstandyq sportshy Marııa Brovkovanyń kanoedan jasóspirimder arasynda álem chempıony atanǵanyn jazǵan bolatynbyz.
