Qazaqstandyq eskekshi Marııa Brovkova álem chempıonatynyń kúmis júldegeri atandy

ORAL. QazAqparat - Qazaqstandyq eskekshi Marııa Brovkova Italııanyń Aýronzo qalasynda baıdarka men kanoedan jasóspirimder men jastar arasynda ótip jatqan álem chempıonatynda kúmis júldeger atandy, dep habarlaıdy QazAqparat tilshisi.

Batysqazaqstandyq sportshynyń anasy ári jeke bapkeri Elena Brovkovanyń málim etkenindeı, Marııa 18 jasqa deıingiler arasynda búgin bir adamdyq kanoeda 500 metr qashyqtyqta máre syzyǵyn ekinshi bolyp qıdy.

Qazaqstandyq eskekshi tek majarstandyq Agnes Kısqa jol berdi.

«Qyzym búgin bir adamdyq kanoeda 200 metr qashyqtyqta óner kórsetedi. Erteń 5000 metrlik jarysta synǵa túsedi», - dedi QazAqparat tilshisine E. Brovkova.

Marııa Brovkova ótken jyly jasóspirimder arasynda álem chempıonatynda da altyn men kúmis júldeni jeńip alǵan edi. Oǵan keshe taǵy bir altyndy qosty.

Eske sala keteıik, budan buryn qazaqstandyq eskekshi Marııa Brovkovanyń taǵy da álem chempıony atanǵanyn jazǵan bolatynbyz.