Qazaqstandyq esirtki tasymaldaýshylardyń isi sotqa berildi - Ózbekstan
TAShKENT. 20 maýsym. QazAqparat /Qurmat Samarhan/ - Ózbekstanda ustalǵan qazaqstandyq esirtki tasymaldaýshylardyń qylmystyq isi sotqa berildi. Bul týraly Qazaqstannyń Ózbekstandaǵy elshiliginiń konsýly Babyr Dáýrenbek málim etti.
Mamyr aıynyń sońynda jergilikti telearnalar men ınternet-basylymdar Ózbekstannyń Sýrhandarııa oblysynda aýǵan-ózbek shekarasynda Qazaqstannyń eki azamaty ustalyp, olardyń asqazandarynan geroın salynǵan kapsýlalardyń tabylǵanyn habarlaǵan edi.
Osyǵan baılanysty, Ózbekstannyń Termez qalasyna Qazaqstan elshiliginiń konsýly B.Daýrenbek joldanyp edi. Sapar barysynda dıplomat, ustalǵan Qazaqstannyń eki azamaty - Muhammadkárim Qarabaıuly men Muhammedamın Jalǵasbaıulyna qatysty Ózbekstannyń arnaıy qyzmeti júrgizgen qylmystyq istiń mán-jaıymen tanysty. Tergeý materıaldarynan málim bolǵandaı, Qazaqstannyń atalǵan eki azamaty geroın salynǵan kapsýlalardy jutyp, Aýǵanstannan Qazaqstanǵa esirtki alyp ótpek bolǵan. Biraq kedendik tekserý kezinde olar ustalyp, medıtsınalyq mekemege jetkizilgen, kapsýlalar sol jerde alynǵan.
Jınalǵan materıaldardyń negizinde Qazaqstan azamattary asa iri kólemde esirtki zattaryn kontrabandalaý jáne iri kólemde esirtki zattaryn satý áreketi úshin aıyptalyp otyr.
