Qazaqstandyq erkin kúres sheberi Azııa chempıony atandy

NUR-SULTAN. QazAqparat - Qytaıdyń Sııan qalasynda kúres túrlerinen ótip jatqan Azııa chempıonatynyń alǵashqy kúninde Qazaqstan quramasy 1 altyn, 1 kúmis jáne 2 qola júldeni jeńip aldy, dep habarlaıdy QazAqparat tilshisi.

Ulttyq olımpıada komıteti habarlaǵanyndaı, jarysty birinshi bolyp erkin kúres sheberleri bastady.

Birinshilik, ásirese, 70 kg salmaqta synǵa túsken Nurqoja Qaıpanov úshin tabysty boldy. Sońǵy básekede japonııalyq Kodjıra Shıgany 9:0 esebimen bet qaratpaı utyp, óz sporttyq jolynda tuńǵysh ret Azııa chempıony atandy.

Sondaı-aq 65 kg salmaqta kilemge shyqqan Saıatbek Oqasov fınalda úndistandyq Badjrang Badjranshtan 7:12 esebimen jeńilis taýyp, kúmis júldege ıe boldy.

Taǵy bir qazaq balýany Ǵalymjan Óserbaev 79 kg salmaqta qola júlde úshin beldesýde japonııalyq ıÝta Abeni 6:0 esebimen tize búktirdi.

Oǵan qosa 97 kg salmaqta baq synaǵan Erǵalı Álisher qyrǵyzstandyq Magomed Mýsaevtyń meselin qaıyryp, qola júldeger atandy.

Erteń Azııa chempıonatynda 61, 74, 86, 92 jáne 125 kg salmaqtaǵy balýandar júldelerdi sarapqa salady.

Eske sala keteıik, budan buryn eki qazaq balýanynyń erkin kúresten Azııa chempıonatynyń fınalyna ótkenin jazǵan bolatynbyz.

Foto: olympic.kz