Qazaqstandyq elshi Elbasyn kútip alý úshin ızraıldik qonaq úıdi «basqardy»
Ol qonaqúı apartamentin Prezıdent Nursultan Nazarbaevtyń Izraıl premer-mınıstri Arıel Sharonmen kelissózder ótkizýine daıyndaý qajet bolǵan.
«2000 jyldyń sáýir aıynda Qazaqstan Prezıdenti Nursultan Nazarbaev Izraılge ekinshi ret resmı saparmen keldi. Memleket basshysyn Ierýsalım qalasynda jańadan ashylǵan «Hılton» qonaqúıine ornalastyrý týraly sheshim qabyldandy. Bizdiń Prezıdentke deıin munda AQSh prezıdenti Bıll Klınton men RF prezıdenti Borıs Eltsın ǵana qonaqtaǵan bolatyn. Sol qonaq úıde Izraıldiń qaıta saılanǵan premer-mınıstrimen birqatar ekijaqty kezdesýler josparlandy jáne Elshiniń keńesshisi uıymdastyrý jumystaryna jaýapty adam retinde meni tańdady. Ádettegideı, qonaqúıge erte kelgen men, birinshi kezekte ǵımarattyń daıyndyǵyn tekserýge kiristim. Sóıtsem, nysan túk te daıyn emes! Kóz aldymda taýdaı úıilgen ydys-aıaq (ótken sharadan qalǵan), qalǵyp-múlgigen qyzmetkerler, qonaqúı jańadan ashylǵandyqtan qyzmetkerler kásibılik turǵyda aqsap turǵan edi. Izraıl SІM protokoly únsiz ǵana ıyǵyn kóterdi», - deıdi Elshi.
Al shaǵyn quramdaǵy kelissózder josparlanǵan ekinshi bólme tipti bos bolmaı shyqty. Tyǵyryqtan shyǵar jalǵyz jol - kelissózderdi Memleket basshysynyń apartamentinde ótkizý boldy.
«Jaýapkershilikti óz moınyma alyp, Prezıdenttiń Kúzet qyzmetiniń ofıtserinen kezdesýdiń hattamalyq daıyndyǵyn ótkizý úshin prezıdenttik nómirdi ashýdy suradym. Ýaqyt óte tyǵyz, 30 mınýt qana qaldy. Oıymda birinshi ushaqpen Qazaqstanǵa qaıtyp bara jatqanymdy elestetip úlgerdim. Qonaqúı qyzmetkerleri jedel sheshim qabyldaı almady, olarǵa joǵary basshylyqtyń kelisimderi men túrli nusqaýlyqtary qajet boldy. Oǵan bizde esh ýaqyt joq. Bar kúsh-jigerimdi jınap, qonaq úıdi basqarýdy qolǵa aldym. Keńestik kezeńde komsomol jáne partııa jumystarynda basshylyq laýazymdaryn atqaryp júrip jınaǵan tájirıbeme súıenip, qonaqúı qyzmetkerlerine qatań túrde buıryq bere bastadym», - dedi Bolat Sársenbaev.
«Baqytyma oraı, Prezıdentti qonaqúı aldynda odan suhbat alǵysy kelgen jýrnalıster birneshe mınýt ustap turdy. Sol sátte «meniń» qyzmetkerlerim tazalaý jumystaryn aıaqtap, las ydystardy shyǵaryp, zaldy keńeıtilgen quramdaǵy kezdesýge ázirledi. Prezıdent kelissózder zalyna kirgen kezde, birneshe mınýt buryn munda ne bolǵanyn eshkim ańǵarǵan da joq», - dep tolyqtyrdy ol.
Keńeıtilgen quramdaǵy kelissózder júrip jatqanda, premer Arıel Sharonmen shaǵyn quramdaǵy kezdesý úshin Memleket basshysynyń apartamentinde qyzý daıyndyq júrip jatty. «Eki kezdesý de sátti ótti», - deıdi dıplomat.
«Mundaı keleńsizdikter qaıtalanbas úshin, keıingi eki kún boıy tańerteń qonaqúı qyzmetkerlerimen Prezıdent sapary aıasyndaǵy túrli sharalardy ótkizýge daıyndyq jóninde nusqamalyq jınalys ótkizdim. Sapar qorytyndysy boıynsha, Prezıdent Elshiliktiń jumysyna joǵary baǵa berdi, al qonaq úıdiń bas menedjeri meniń qonaq úıdi op-ońaı basqaryp kete alatynymdy aıtty», - dep eske aldy B.Sársenbaev.
Elshiniń bul oqıǵasy Qazaqstan Respýblıkasy dıplomatııalyq qyzmetiniń 25 jyldyǵyna arnalǵan «Dıplomatııalyq epızodtar» jobasy aıasynda QR Syrtqy ister mınıstrliginiń Feısbýktaǵy paraqshasynda jarııalandy.
Eske sala ketsek, 2 shilde kúni Qazaqstanda Dıplomatııalyq qyzmet kúni atalyp ótedi.