Qazaqstandyq «El Frıman» kórkem fılmi Madrıd kınofestıvaline qatysady
ASTANA. QazAqparat - «El Frıman» kórkem fılmi ústimizdegi jyldyń 21-28 shilde aralyǵynda Madrıd qalasynda ótip jatqan halyqaralyq kınofestıvalge qatysady. Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jaryqqa shyǵarǵan kınotýyndy «Úzdik operator» jáne «Úzdik rejısser-debıýtant» nomınatsııalarynda baq synaıdy, dep habarlaıdy QazAqparat «Qazaqfılmniń» baspasóz qyzmetine silteme jasap.
Rejısser-debıýtant Eljas Raqymbekov (shyǵarmashylyq laqap aty Mıhar Sajle) pen Antonıo Chaves túsirgen kartına Los-Andjeleste amerıkandyq úkimetten jasyrynyp júrgen ımmıgranttyń ómiri týraly baıandaıdy.
«Festıvalden tek jaqsy jańalyq kútemiz. «Úzdik rejısser-debıýtant» júldesine úmitkerler qataryna engenimizge qýanyshtymyn. Árıne, júldeli orynnan kórinetinimizge senimdimin. Fılmniń operatory Erık Konash «Úzdik operator» júldesine laıyq dep oılaımyn», - deıdi fılmniń so-rejısseri Eljas Raqymbekov.
Madrıd qalasynda jyl saıyn ótkiziletin halyqaralyq kınofestıvalde túrli elden kelgen kınoındýstrııanyń ókilderi, atap aıtsaq, jas kınogerler men kásibı rejısserler, dıstrıbıýtorlar men basqa da mamandar bas qosady. Kınematografııanyń barlyq belgili janrlaryna esigi ashyq bul festıvalde jas býyn rejısserlerge, zamanaýı tendentsııalar men kıno salasynyń damýyna yqpal jasaıtyn trendterge asa kóńil bólinedi.
Fılm ne týraly? El - Los-Andjeleste amerıkandyq bılikten jasyrynyp júrgen ımmıgrant. Ol óz kóliginde túnep júrip, júk tasýshy bolyp jumys isteıdi. El dosy Artýrmen birge kiltterdiń kóshirmesin jasap, kompanııanyń burynǵy klıentterin tonap, kúnin kóredi. Bir kúni olar baı, biraq jalǵyzbasty Ambassador esimdi qarııamen tanysady.
Óndirisi: Sh.Aımanov atyndaǵy «Qazaqfılm» AQ jáne Libertus Films
Janry: drama, krımınal.
Uzaqtyǵy: 77 mınýt
Rejısserleri: Eljas Raqymbekov (Mıhar Sajle), Antonıo Chaves
Prodıýserler: Anar Júnisova, Marıetta Volynska, Nurlan Raqymbekov
Stsenarıı avtory: Eljas Raqymbekov (Mıhar Sajle), Erık Konash
Operatory: Erık Konash
Rólderde: Eljas Raqymbekov, Mantas Valantıýs, Álim Qulıev, Hal Dıon, Annakeıt Chapel
