Qazaqstandyq eksporttaýshylardyń shyǵyndaryn óteýdiń jeńildetilgen erejesi kúshine enedi
NUR-SULTAN. QazAqparat - 3 qazannan bastap qazaqstandyq eksporttaýshylardyń shyǵyndaryn óteý jónindegi jeńildetilgen erejeleri kúshine enedi, dep habarlaıdy QazAqparat Saýda jáne ıntegratsııa mınıstrliginiń baspasóz qyzmetine silteme jasap.
Vedomstvo eldiń shıkizattyq emes eksportynyń úlesin keńeıtý jáne ulǵaıtý maqsatynda otandyq óńdelgen taýarlardy ilgeriletý boıynsha ındýstrııalyq-ınnovatsııalyq qyzmet sýbektileriniń shyǵyndaryn óteý jónindegi qoldanystaǵy qaǵıdalarǵa birqatar túzetý engizgen.
Atalmysh erejelerde kásipkerlerdiń usynystaryn eskere otyryp, qoldaý kórsetý tártibi aıtarlyqtaı jetildirildi.
«Jańa erejelerde qujattar paketi ońtaılandyryldy, shyǵyndardyń jańa túrli engizildi, óteletin taýarlardyń tizbesi ózektendirildi, taýardy qaıta bólý deńgeıine baılanysty óteý lımıtterin gradatsııalaý, sondaı-aq shyǵyndar úshin ótem alý kezinde kásiporyndardyń qarsy mindettemeleri qarastyrylǵan. Máselen, jol paraǵyn, túrli anyqtamalardy, fotosýretterdi jáne basqa da qujattardy usyný qajettiligi joıyldy.
Endi treıderler men dıstrıbıýtorlar, sondaı-aq óńdelgen taýarlardy eksporttaıtyn aýyl sharýashylyǵy óndiristik kooperatıvteri shyǵyndardyń bir bóligin óteı alady», delingen habarlamada.
Mınıstrliktiń málimetinshe, syrtqy naryqtardaǵy saýda sórelerin jalǵa alý tólemine jumsalǵan shyǵyndar da óteledi.
Standarttaý úshin taýarlardy jetkizý kezinde shyǵyndardyń bir bóligin óteý lımıti aǵymdaǵy qarjy jylyna bólingen qarajattyń kóleminiń buryn kórsetilgen 1/50 ornyna 75 000 AEK-ke deıin ózgertildi. Osylaısha, kepildik berilgen ótem somasy bıýdjetteýge baılanysty bolmaıdy.
Jańa erejelerde kásiporyndardyń qarsy mindettemeleri boıynsha máseleler de rettelgen.
Budan basqa, kásiporyndardan ótinimder endi tek elektrondy túrde qabyldanatyn bolady, bul ýaqytty únemdeýge jáne ótinish berýshilerdiń qosymsha poshta shyǵyndaryn joıýǵa múmkindik beredi.
«Shyǵyndardy óteýge ruqsat alǵan kompanııalar negizinen kórshi elderge: Reseıge, Ózbekstanǵa, Qyrǵyzstanǵa, Tájikstanǵa, Qytaıǵa eksporttaıdy. Sondaı-aq Shveıtsarııa, Bangladesh, Irlandııa, Bahreın elderine shyǵýda. Sonymen qatar, shyǵyndardy óteý arqyly Afrıka, Taıaý Shyǵys, Ońtústik-Shyǵys Azııa, AQSh jáne t. b. jańa naryqtarǵa shyǵý ońaıyraq bolady.
Osy memlekettik qoldaý sharalarynyń barlyǵy kásiporyndarǵa saýdada neǵurlym tıimdi jáne básekege qabiletti bolýǵa, sondaı-aq ishki óndiris pen eksporttyq túsim kólemin ulǵaıtýǵa múmkindik beredi. Osylaısha, salyq aýdarymdaryn ulǵaıta otyryp, ulttyq ekonomıkanyń damýyna, qazaqstandyqtardyń ál-aýqatynyń ósýine, áleýmettik baǵdarlamalardyń iske asyrylýyna oń serpin berý kerek, - dedi «QazIndustry» qazaqstandyq ındýstrııa jáne eksport ortalyǵy» AQ Basqarma tóraǵasynyń orynbasary Aıdar Kákimjanov.
Jańa erejeler 2020 jylǵy 3 qazannan bastap kúshine enedi.
Ótinimderdi qabyldaýdy Saýda jáne ıntegratsııa mınıstrliginiń operatory – «QazIndustry» qazaqstandyq ındýstrııa jáne eksport ortalyǵy export.gov.kz portaly arqyly júzege asyrady.
