Qazaqstandyq eksporterler Saýda mınıstrligine kóbinde qandaı máselelermen júginedi

NUR-SULTAN. QazAqparat – Saýda jáne ıntegratsııa mınıstri Baqyt Sultanov qazaqstandyq eksporterler mınıstrlikke kóbinese qandaı suraqtarmen júginetinin aıtyp berdi, dep habarlaıdy QazAqparat tilshisi.

«Biz @exportgov telegramm-chaty arqyly eksporterlermen «tikeleı baılanysty» jolǵa qoıdyq. Táýlik boıy bizdiń mamandar bıznes ókilderinen ótinimderdi qabyldap, týyndaǵan máselelerdi barynsha tez sheshýge tyrysady», - dedi Baqyt Sultanov OKQ-da ótken baspasóz máslıhatynda.

Mınıstr sonymen qatar eksporterlermen júrgizilgen saýalnama barysynda olardyń kóbinese qandaı máselelermen betpe-bet kelgeni anyqtalǵan.

«Olar – eksporttyq analıtıkalyq turǵyda qoldaý, eksporttyq qujattamany daıarlaý kezinde konsaltıng, jeńildikpen beriletin qarajatty alý máseleleri», - dedi ol.

Saýda jáne ıntegratsııa mınıstri saýalnama nátıjesinde naryqtardyń syrtqy taldaý blogyna kóbirek nazar aýdaryla bastaǵanyn jetkizdi.

«Osy jyldyń 9 aıynyń ózinde 103 kásipkerge eksporttyq baǵyttaǵy jumysty engizýdi jaqsartý kerektigi jóninde keńes berildi. Ónimderin syrtqa shyǵarý boıynsha kásiporyndarǵa arnalyp, 14 salalyq Ekspress Daıdjest daıyndaldy. Shetelderdegi mekemelerimizben ózara qarym-qatynas jasaýdyń úshdeńgeıli modeli retke keltirildi: elshilikter Qazaqstannyń saýda agentine aınalyp, kontrseriktesterdi izdeý boıynsha jumystardy júrgizýde. Sonymen qatar eksporterlerdi memlekettik turǵyda qoldaýdyń monetarlyq quraldary belsendi túrde iske qosyldy», - dedi Baqyt Sultanov.