Qazaqstandyq ekologtar BUU-nyń damytý baǵdarlamasymen birlesip jumys jasaýda

ASTANA. QazAqparat - Elordada «Jańartylǵan energııa kózderi týraly qoldanystaǵy zańnamaǵa ózgerister men tolyqtyrýlar engizýdiń kontseptýaldyq negizderin talqylaý» atty respýblıkalyq ǵylymı konferentsııa ótti, dep habarlaıdy QazAqparat.

Konferentsııanyń ashylý saltanatynda sóz sóılegen «Baıtaq Bolashaq» RQB prezıdenti Azamathan Ámirtaı jıynnyń mańyzdylyǵyna toqtalyp ótti.

«Biz balamaly energııa kózderin damytýdy odan ári jalǵastyrý kerekpiz. Tehnologııa damyp, ýaqyt ótken saıyn keıbir talaptardy ózgertýge týra keledi. Talaptardy ózgertý arqyly biz energetıka salasynyń damýyna múmkindik jasaımyz. Sondyqtan, qazirgi qoldanystaǵy energııa kózderi týraly zańǵa ózgertý men tolyqtyrý engizý týraly usynysymyzdy bersek deımiz. Biz usynǵan ózgerister ázirge 21 tarmaqtan turady. Biraq, qatysýshylardyń usynystary men pikirlerin eskere otyryp, bul tarmaqtardyń sanyn ózgertýimiz múmkin. Bul rette biz BUU-nyń damytý baǵdarlamalarymen de birigip jumys jasap jatqanymyzdy atap ótkim keledi», - dedi Azamathan Ámirtaı.

Konferentsııaǵa elimizge belgili qoǵam qaıratkerleri - Oljas Súleımenov, Asqar Jumadildaev, Amangeldi Aıtaly, Irak Elekeev, Saltanat Rahymbekova jáne QR Parlamenti Májilisiniń depýtaty Gennadıı Shıpovskıh qatysty.

Qatysýshylar taqyryptyq baıandamadan soń jaryssózge kezek berip, jıyn sońynda bes bólikten turatyn  qarar qabyldady.