Qazaqstandyq eki fılm Irandaǵy festıvalge qatysady
ALMATY. QazAqparat - Rejısser Vladımır Tıýlkınniń «13 shaqyrym» jáne rejısser Berik Jahanovtyń «Ata kásip» fılmderi 29 sáýir men 4 mamyr aralyǵynda Irannyń Vareg qalasynda ótetin 9-shi Halyqaralyq kınofestıvaldiń basty baıqaýyna qatysady, dep habarlaıdy QazAqparat.
«Qazaqfılm» kınostýdııasynyń málimetinshe, Kaspıı mańy elderiniń fılmderine negizdelgen bul festıval kelesi taqyryptarǵa túsirilgen týyndylarǵa asa nazar aýdarady, olar: salt-joralǵylar, ulttyq jáne dinı dástúrler, ańyz-áńgimeler, poezııa, sondaı-aq ulttyq arhıtektýra, qolóner jáne sharýa júrgizý tásilderi týraly fılmder.
Atalǵan eki kınotýyndyny QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen.
«13 shaqyrym» atty derekti fılm Serik Bodanbaev esimdi zaǵıp týraly baıandaıdy. Qystaýdan óz aýylyna qaraı bet alǵan basty keıipker óz ómiriniń eleýli sátterin eske alyp, óz boıyndaǵy qundylyqtarynyń syryn ashady.
- Fılm álemdegi kóptegen festıvalderge qatysyp, júldeli oryndardan kórindi. Endi mine, Irandaǵy festıvalde baq synamaq, - dedi fılmniń rejısseri Vladımır Tıýlkın.
Al Berik Jahanovtyń «Ata-kásip» derekti fılmi «Qazaqstannyń túrki tektes halyqtary» tsıkly boıynsha arnaıy túsirilgen. Bul derekti tsıkl kóp ultty Qazaqstanda turatyn túrki etnosyna arnalǵan. Atalǵan derekti fılm ózbek ulty týraly, onyń ishinde ata-kásip - besik jasaýmen aınalysatyn 47 jastaǵy Abdýmanat esimdi sheberdiń ómirin baıandaıdy.
- Fılm Iranda kórsetiletinine qýanyshtymyn. Túsirý tobyna jáne de maǵan senip, erekshe qoldaý bildirgen «Qazaqfılm» kınostýdııasy «Derekti kıno» shyǵarmashylyq birlestiginiń jetekshisi Áset Ernazarovqa alǵysymdy aıtamyn, - dedi rejısser Berik Jahanov.
