Qazaqstandyq eki boksshy Germanııada «Chemistry Cup» jartylaı fınalyna shyqty
ASTANA. QazAqparat - Temirtas Júsipov pen Іlııas Súleımenov Galle qalasynda (Germanııa) ótip jatqan halyqaralyq týrnırdiń jartylaı fınalyna shyqty, dep habarlady Qazaqstandyq boks federatsııasynyń baspasóz qyzmeti.
Týrnırdegi óziniń debıýttik jekpe-jeginde Temirtas Júsipov (49 keli) ırlandtyq Hýshı Maıersti aıqyn basymdylyqpen utty - 3:0, al Іlııas Súleımenov (52 keli) nemis sportshysy Hamza Týbany 3:0 esebimen jeńip ketti. H.Týba tájirıbeli bolýyna (Almatydaǵy álem chempıonatyna jáne WSB dodasyna qatysqan) qaramastan oǵan týǵan eliniń qabyrǵasy da súıeý bola almady, bizdiń boksshynyń tegeýrini shydas bermedi. Almasbek Áldıbekov (64 keli) tájirıbeli moldavan boksshysy Dmıtrıı Galagotaǵa 1:2 esebimen ese jiberdi.
Búgin túnde rıngke Berik Ábdirahmanov (60 keli) men Ádilbek Nııazymbetov (81 keli) shyǵady, olar tıisinshe Frantsııadan Sofıan Oýmımen jáne Anglııadan Loýrens Osýkemen qolǵap túıistiredi.
Erteń Temirtas Júsipov Túrkııa ókili Tolgan Óztúrikpen urys ótkizedi, al Іlııas Súleımenovtiń qarsylasy búgin keshke - úshinshi sessııada belgili bolady.
