Qazaqstandyq eki áýekompanııa Eýropaǵa ushýǵa ruqsat aldy
ASTANA. QazAqparat - «Eır Astana» AQ-dan bólek Qazaqstannyń taǵy eki áýe kompanııasyna Eýropaǵa ushý týraly ruqsat berildi, dep habarlaıdy QazAqparat.
«Bıylǵy 1 maýsymda «PrimeAviation» AQ men 12 maýsymda «KazAirJet» AQ áýe kompanııalary EASA-dan (Ushý qaýipsizdigi jónindegi Eýropalyq avıatsııalyq agenttik) barlyq qajetti rásimderden sátti ótkenderi týraly jáne eýropalyq talaptarǵa sáıkes keletindigi jóninde jazbasha ruqsat aldy»,-delingen QR IDM baspasóz qyzmetiniń málimetinde.
Búgingi kúni «qara tizimde» qazaqstandyq áýe kompanııalary joq.
Aıta keteıik, Eýropalyq odaqqa úshinshi elderden reısterdi júzege asyrý maqsatynda 2014 jyldyń sáýir aıynda Eýropalyq komıssııa úshinshi elder eksplýatanttarynyń avtorızatsııadan mindetti túrde ótý talabyn engizgen bolatyn. Atalmysh avtorızatsııalaý rásimin EASA júzege asyrdy. Eksplýatantty avtorızatsııalaý rásimine sáıkes, EASA-ge reısti oryndaýdyń aldynda erterek tapsyrys berip qoıý kerek.
«SCAT» áýe kompanııasy alǵashqy avtorızatsııa tapsyrysyn 2015 jyldyń 25 mamyrynda bergen. Ótken jyldyń sońynda qazaqstandyq áýe kompanııalar úshin Eýropaǵa ushýǵa qoıylǵan shekteý resmı túrde alynyp tastalǵannan keıin, 2017 jyldyń 11 sáýirinde EASA men «SCAT» AQ ókilderiniń tehnıkalyq-keńestik kezdesýi boldy.
Saraptama nátıjesi boıynsha EASA «SCAT» áýe kompanııasyna birqatar eskertýler jasady. Eksplýatant eskertýge sáıkes tıisti jumystar atqaryp, kemshilikterdi joıatyn bolady.
Osylaısha, búgingi kúni otandyq «AirAstana» AQ, «PrimeAviation» AQ jáne «KAZ AIR JET» AQ áýe kompanııalary EASA avtorızatsııasynan sátti ótip shyqty.
