Qazaqstandyq dzıýdoshysy Azııa kýbogynda altyn medal jeńip aldy

AQTAÝ. QazAqparat - Aqtaýda dzıýdodan erler men áıelder arasyndaǵy Turar Joldybaevty eske alýǵa arnalǵan ashyq Azııa kýbogy aıaqtaldy. Armııa Ortalyq sport klýbynyń nusqaýshy sportshylary týrnırde ár túrli dárejedegi úsh medaldy qanjyǵalaryna baılady.

Jalpy alǵanda jarysqa Avstralııa, Qazaqstan, Qyrǵyzstan, Reseı, Tájikstan jáne Ózbekstan elderinen 198 bilekti sportshy qatysty.

Jarys qorytyndysy boıynsha 100 keliden astam salmaq dárejesinde armııa sportshysy efreıtor Erasyl Qajybaev chempıon atandy. Aqtyq synda ol «Qazaqstan Barysy – 2017» tıtýlynyń ıegeri, otandasy Elaman Erǵalıevti jeńdi. 60 kelige deıingi salmaq dárejesinde OSK sport rotasynyń merzimdi qyzmet áskerı qyzmetshisi qatardaǵy jaýynger Dáýren Sıýkenov kúmis medalǵa ıe boldy. 100 keliden joǵary salmaq dárejesinde efreıtor Ádil Orazbaev qola júldegeri atandy.

«Men jattyqtyrýshylarymnyń, áriptesterimniń jáne dostarymnyń senimin aqtaǵanyma óte qýanyshtymyn. Tálimgerlerdiń barlyq tapsyrmalaryn oryndap, «altyn» jeńip aldym. 19 naýryzda áskerı qyzmetshiler arasynda ótetin «Ásker barysy – 2021» tıtýlyna irikteý týrnırinde Qarýly Kúshterdiń namysyn qorǵaýǵa tyrysamyn», – dep bólisti áskerı sportshy efreıtor Erasyl Qajybaev.

Turar Joldybaevty eske alýǵa arnalǵan dzıýdodan ashyq Azııa kýbogy lıtsenzııalanǵan týrnır bolyp tabylatynyn aıta ketý kerek. IJF erejeleri boıynsha týrnır chempıondary men júldegerleri Halyqaralyq dzıýdo federatsııasynyń reıtıngi esebine upaı alady: birinshi oryn – 100 upaı, ekinshi oryn – 60 upaı jáne úshinshi oryn – 40 upaı.