Qazaqstandyq dzıýdoshylar Polshada ótken jarysta tórt altyn medalǵa ıe boldy
ORAL. QazAqparat - Qazaqstandyq dzıýdoshylar Polshanyń Olesnıtsa qalasynda jastar arasynda ótken halyqaralyq týrnırde tabysty óner kórsetti, dep habarlaıdy QazAqparat tilshisi.
QR Ulttyq olımpıada komıteti málim etkenindeı, atalǵan jarysqa álemniń 21 elinen 347 tatamı sheberi qatysyp, baq synady.
Qazaqstan jastar quramasy sapynda 15 dzıýdoshy bolsa, sonyń jeteýi júldemen oraldy. Arsen Hatıp pen Nurbek Myqtybekov baptaıtyn qazaqstandyqtar medal sany jóninen komandalyq esepte birinshi orynǵa ıe boldy.
Ásirese, Erlan Ońalov (55 kg), Bolat Bilál (60 kg), Nurzat Sálimbaev (66 kg), Serikbolsyn Shyntas (90 kg) altynnan alqa taǵyp, el mártebesin bıiktetti.
Sondaı-aq Ulyqbek Ábilhaıyr (55 kg) kúmis, Súıinish Almazuly (55 kg) men Aıbar Muqyshev (73 kg) qola júldege ıe boldy.
Eske sala keteıik, batysqazaqstandyq Erlan Ońalov - buǵan deıin de halyqaralyq jarystarda olja salyp júrgen sportshy.
Onyń ótken jyly Eýropa kýbogynyń qola júldegeri atanǵanyn jazǵan bolatynbyz.
