Qazaqstandyq dzıýdoshylar Germanııada ótken Eýropa kýbogynda 6 medal enshiledi
ASTANA. QazAqparat - Dzıýdodan Qazaqstannyń ulttyq quramasy Germanııanyń Zındelfıngen qalasynda ótken Eýropa kýbogynda 6 medal jeńip aldy, dep habarlady sporttyq jekpe-jek jáne kúsh qoldanylatyn sport túrleri konfederatsııasynyń baspasóz qyzmetinen.
«Qorytyndy kúnde Ermek Imambekovtiń komandasy taǵy úsh medal enshiledi. Samat Esen (90 keli), Ázız Qalqamanuly (90 keli) jáne Erjan Shynkeev (+100 keli) qola medal jeńip aldy. Qazaqstandyq tatamı sheberleriniń enshisine 6 medal bar», - delingen habarlamada.
Esterińizge sala keteıik, Eýropa kýbogynyń altyn medalin 73 kelige deıingi salmaq sanatynda beldesken Azamat Mýsın jerlesi Sergeı Lımdy jeńip alǵan bolatyn. Al 66 keli salmaq sanatynda el namysyn qorǵaǵan Eldos Smetovtiń qanjyǵasynda qola medal bar.
