Qazaqstandyq dzıýdoshylar Eýropa kýbogynda ekinshi oryn aldy
ASTANA. QazAqparat - Reseıdiń Orenbýrg qalasynda dzıýdodan ótken ashyq Eýropa kýbogynda qazaqstandyqtar 1 altyn, 1 kúmis jáne 2 qola medalǵa qol jetkizdi, dep habarlaıdy QazAqparat tilshisi.
QR Dzıýdo federatsııasynyń baspasóz qyzmeti málim etkendeı atalǵan dodaǵa Qazaqstannan 27 tatamı sheberi qatysqan. Al jalpy álemniń 16 elinen 279 dzıýdoshy júldege talasty.
Jarysqa qatysqan osy 20-ǵa jýyq elderdiń arasynda Qazaqstan sportshylary 1 altyn, 1 kúmis jáne 2 qola medalǵa qol jetkizip, týrnır kestesinde 2 orynǵa jaıǵasty.
Jarystyń birinshi kúninde 73 kelige deıingi salmaqta Qazaqstan sapynan tatamıge shyqqan Nurlan Orazalın qarsylas shaq keltirmeı, jarys jeńimpazy atandy. Al dál osy salmaqta Nurlan Orazalınge jartylaı fınalda jol bergen taǵy bir otandasymyz Madııar Sembaev jarystyń qola júldesin qanaǵat tutty.
Al burymdy balýandardan boz kilemde beldesken Nazgúl Maratova 78 kelige deıingi salmaqta kúmis alsa, 70 kelige deıingi salmaqta synǵa túsken Ajar Salyqova el qorjynyna ekinshi qolany saldy.
