Qazaqstandyq dzıýdoshylar búgin Bakýdegi «Grand Slam»-de jarystaryn bastaıdy
ASTANA. QazAqparat - Bakýde «Grand Slam» týrnıriniń jerebesi tartyldy, dep habarlaıdy QazAqparat tilshisi.
9 naýryz kúni Ázerbaıjan astanasynda «Grand Slam» halyqaralyq týrnıriniń jerebe tartý rásimi ótti.
Álemniń 31 elinen 183 sportshy qatysatyn bul dodada Qazaqstan ulttyq quramasy sapynan 14 dzıýdoshy el namysyn qorǵaıdy. Jarystyń birinshi kúninde sportshylar bes salmaq boıynsha ózara myqtyny anyqtaıdy.
Sonymen, búgin myna salmaq dárejesindegi sportshylar baq synaıdy:
Áıelder: -48 kg, -52 kg, -57 kg
Erler: - 60 kg, -66 kg
Atalǵan salmaq boıynsha 10 naýryzda Qazaqstannan 7 sportshy tatamıge shyǵady.
Jerebe boıynsha 60 kelide «A» tobyna túsken Ǵusman Qyrǵyzbaev alǵashqy aınalymda vengrııalyq Szabo Shabýmen beldesedi. Ony utqan jaǵdaıda Rıo Olımpıadasynyń qatysýshysy, jergilikti balýan Orhan Safarovpen kezdesedi. Osy salmaqta «V» tobyna túsken taǵy bir jerlesimiz Rýstam Ibraev alǵashqy beldesýin Qyrǵyzstannyń jas sportshysy Saǵynbaıuly Baıamanmen beldesedi.
66 kelide otandasymyz Ǵabıt Esimbetov grýzın Gıýnashvılı Lashaǵa qarsy kúresedi. Dál osy salmaqtaǵy ekinshi sportshymyz Qumar Kúzembaev Moldovanyń jas dzıýdoshysy Vıerý Denıspen kezdesedi.
Al 52 kelidegi burymdy balýanymyz Aıkúnim Túıtekovanyń alǵashqy qarsylasy - Pop Rıka (Vengrııa).
57 kelidegi Anna Kazıýlına birinshi beldesýinde jergilikti balýan Shahın Leılamen kúresedi. Ony utqan jaǵdaıdada, ekinshi otandasymyz Servera Nyshanbaeva ekeýi shırek fınal úshin joldamaǵa talasady.
Halyqaralyq «Grand Slam» týrnıri 10-12 naýryz kúnderi Ázerbaıjan astanasy Baký qalasynda ótedi. Jarys kún saıyn Astana ýaqytymen saǵat 12:00-de bastalady.
